Гўзаллик қурбонлик эмас, эътибор талаб қилади. Тери гўзаллигини сақлашга ёрдам берувчи одатлар

Кундалик одатлар нафақат саломатлик, балки ташқи кўринишга ҳам таъсир қилади. Қуйида сиз эътибор бермайдиган, аммо гўзал бўлишда аҳамияти бўлган одатлар хусусида гаплашамиз.

Уйқу

Уйқу меъёрдан кам бўлмаслиги, қорин жуда тўқлигида ухлаш соғлиққа зарар эканини ёдда тутинг. Шунингдек, қандай усулда ухлаш кераклиги ҳам муҳим рол ўйнайди. Инсон қорни билан ёки ёнбошлаб ётганида тери нафас олмаслиги, қон яхши айланмаслиги ва тери эзилиши мумкин. Бунинг оқибатида эса ажинларнинг пайдо бўлиш эҳтимоли катта. Бунинг иложи йўқ, одам тепага қараб ётгани билан кечаси билмаган ҳолда ўгирилади-ку деб ўйловчиларга, икки томонларига ёстиқ қўйиб ётишни тавсия қиламиз.

Тери парвариши

Терингизни мунтазам намлантириб туришга аҳамият беринг. Қуриган терида чизиқлар ҳосил бўлиши, осилиш ва ажинлар пайдо бўлишига мойиллик бўлади. Бу эса ўз навбатида эрта қариш ёки қари кўринишга олиб келади. Шунинг учун таркибида кимёвий моддалар кам бўлган гель ва терини тозаловчи восита ва тери учун мўлжалланган гидрофитли ёғлардан фойдаланинг. Йўқ деганда табиий маҳсулотлардан уй шароитида ниқоб ва крем тайёрланг, сутли маҳсулотлардан бўтқа қилиб юзингизга суртинг. Ишонинг қиммат кремлардан-да, аъло натижа беради.

Макияжни ўчиришни унутманг

Бошланган жараён тугалланиши керак эканлигини ёддан чиқарманг. Ёш ва гўзал кўринишнинг олтин ва асосий қоидаларидан бири — ётишдан аввал макияжни ювиш ҳисобланади. Макияж қилиш вақтида бўйсунмаган эринчоқликка кейин ҳам бўйин эгманг. Иссиққина ўринга ётиб олгандан кейин юзни бўёқлардан тозаланмагани эсига тушадиганлардан бўлсангиз, кроватингиз ёнига юз тозаловчи восита ва пахта дискларини қўйиб қўйинг ва нима бўлган тақдирда ҳам макияжни ўчирмай ухламанг.

Юзингизни бактериялардан сақланг

Қўллар озодалигига фақатгина эпидемия вақтида эмас, балки ҳар куни амал қилиш керак. Қўлингиз билан юзингизга тегар экансиз, бактерияларни терига «миграция» қилишига шароит яратиб берасиз. Бунинг оқибатида юзингизга ҳуснбузар чиқиши, яллиғланиш ва қизаришлар кузатилиши мумкин. Қолаверса, телефондан фойдаланганда ҳам уни ҳадеб юзга олиб бормаслик, уни вақти-вақти билан дезинфекция қилиш тавсия қилинади.