Тошмалар, яллиғланиш ва ҳуснбузарлар пайдо бўлиши ташқи омиллар билан ҳам бевосита боғлиқ. Қуйида сиз эътибор бермайдиган, аммо юзингиз ҳолати қандай бўлишида муҳим рол ўйнайдиган сабабларга тўхталамиз.
Ёстиқ жилди
Тунда юз терисидан куннинг бошқа қисмига нисбатан кўпроқ миқдорда ёғ ажралади. Сиз ётган вақтда, ажралиб чиққан ёғ ёстиққа тегади. Кўзга кўринмагани билан ушбу жараён ҳар куни давом этади ва ёстиқ кирланади. Шу боис ёстиқ жилди ва чойшабларни камида уч кунда алмаштириш, ювиб дазмоллаш тавсия қилинади.
Телефон
Телефонни инфекция манбаси деса ҳам хато бўлмайди. Юзнинг чакка, қулоққа яқин қисмига ҳуснбузар тошиши сабабларидан бири ҳам айнан ушбу алоқа воситаси ҳисобланади. Чанг ва кир жойда қолган, тоза бўлмаган қўл билан ушланган телефонни гаплашиш учун қулоққа олиб борилганда унинг юзасидаги бактерия ва инфекциялар юз терисига ёпишади. Юзингизга турли тошма ва қизаришлар тошишини олдини олишни истасангиз смартфонингизни антисептик воситалар билан зарарсизлантириб туришни ёддан чиқарманг.
Макияжни ювмасдан спорт билан шуғулланиш
Теридан ажралган ёғ, суртилган косметик воситалар билан аралашганда юзингиз қандай аҳволда бўлишини тасаввур қиляпсизми? Саломатлик учун спорт билан шуғулланишга қарор қилган экансиз, бу вақтда юзингиз макияждан холи тўйиб нафас олишига ҳам қўйиб беринг. Машқлардан аввал юз терисини косметик воситалардан тозалашни ёддан чиқарманг.
Сочиқ
Зарарли бактериялар намликни севишини билармидингиз? Йўқ бўлса, билиб олинг: бактериялар нам матоларга ёпишиб, жойлашиб олади. Шу сабабдан ҳам юз сочиғи доим қуруқ бўлиши ва иложи бўлса уни ҳар куни ювиб алмаштириш керак.
Ҳуснбузарларни ўзбошимчалик билан йўқ қилишга уриниш
Қизариб, ҳуснни бузиб тургандек туюлган ҳуснбузарларни қўл билан ичидаги суюқликни чиқариб ташлаш кўпчилик учун таниш ҳолат бўлиши мумкин, лекин оқибати ҳақида ҳамма ҳам билавермайди: қўлда кўзга кўринмас бактериялар лиммо-лим бўлади, сиқилган ҳуснбузар ўрни доғ ва чуқурча бўлиб қолади ва ўзбошимчалик инфекция тушиши ва жиддий муаммоларни келтириб чиқаради.
Юзингизда муаммолар кузатилаётган бўлса, энг аввало шифокор ёки косметологдан маслаҳат олинг. Ҳар қандай усул ва ниқобларни синаб кўришдан аввал юз терингизнинг сезувчанлиги қандай экани ҳақида тўлиқ маълумотга эга бўлинг.
Бошқа қизиқарли маълумотлар:
Изоҳ (0)