Коронавирусга чалинганларни даволаш нима учун тадбиркорлик субъектлари ҳисобидан қопланади? Нурмат Отабеков жавоб берди

Санитария-эпидемиология назорати давлат инспекцияси бошлиғи Нурмат Отабеков АОКА ҳузуридаги штабда бўлиб ўтган брифингда муҳим саволларга жавоб қайтарди. Жумладан, у тадбиркорлик субъектлари зиммасига юкланаётган қўшимча масъулият юзасидан изоҳ берди.

Хабарингиз бор, Республика махсус комиссиясининг қарори билан Ўзбекистонда карантин тадбирлари 1 августга қадар узайтирилган. 1 августгача бўлган вақт мобайнида кучайтирилган давлат санитария назоратини амалга ошириш ҳақида ҳам алоҳида топшириқ бор. Мазкур қарорда карантин чекловлари шароитида фаолият юритишига рухсат берилган тадбиркорлик субъектлари (қурилиш, умумий овқатланиш, хизмат кўрсатиш объектлари ва бошқалар)га тегишли объектларда белгиланган санитария-гигиена талабларига риоя этмаслик оқибатида коронавирус инфекцияси аниқланган тақдирда ушбу объектларни ва шахсларни карантинга олиш ҳамда сақлаш билан боғлиқ харажатлар мазкур субъектлар ҳисобидан қопланиши белгиланган.

Ўзбекистонда карантин ва чеклов тадбирлари амал қилиш баробарида тадбиркорлик субъектлари жуда жиддий сабр-матонатни намойиш қила олди. Ўзбекистон Республикаси, қолаверса, Тошкент шаҳри карантин тадбирларига риоя этиш бўйича жуда юқори рейтингда бўлиб турди. Албатта, буларнинг барчаси кейинчалик эпидемик вазиятда ўз аксини топди. Натижада республикада коронавирус касаллиги бўйича эпидемик вазиятни жиловлаш имконияти пайдо бўлди.

Энди бир тасаввур қилайлик, ҳозирга қадар аниқланган беморлар сони 5 минг нафардан зиёдни ташкил этяпти. Мана шу касалликка чалинганларни карантинда сақлаш, даволаш, реабилитация билан боғлиқ харажатларнинг барчаси давлатимиз бюджети ҳисобидан қопланяпти. Шу пайтгача бу харажатларнинг бирортаси бирор-бир ташкилот ёки тадбиркорлик субъектлари ҳисобидан қопланмаган.

Қарорда белгиланган мазкур банднинг акс этишидан асосий мақсад ‘яшил’ ва ‘сариқ’ ҳудудларда жойлашган қурилиш, умумий овқатланиш хизмати кўрсатишга ихтисослашган тадбиркорлик субъектлари масъулиятни тўлиқ ҳис қилишидир. Карантин тадбирларига риоя этсин. Бу каби ташкилотлар фаолият кўрсатаётган пайтда, албатта, ходимлари дока ниқобда бўлишини таъминласин. Умумий овқатланиш муассасаларида хизмат кўрсатувчи шахсларнинг қўлқопда ва дока ниқобда бўлиши таъминлансин. Мижозлари оралиқ масофа сақлашга риоя этишини назорат қилсин. Ҳар бир мижоздан кейин стол усти дезинфекция воситалари билан ишлов берилсин.

Энг асосий мақсад — касалликнинг бир одамдан иккинчи одамга юқишига йўл қўймаслик. Республикада оғир меҳнатлар эвазига жиловланган эпидемик вазиятни мураккаблаштириб юбормаслик, яна карантин ва чеклов тадбирларини кескин ва қаттиқ бўлишига йўл қўймаслик.

Нурмат Отабеков, Санитария-эпидемиология назорати давлат инспекцияси бошлиғи

Шунингдек, брифингда коронавирус инфескияси ташувчисини аниқлашда барча воситалар, жумладан, кузатув камералари сафарбар қилиниши айтилган.

«Эпидемиологик суриштирув вақтида касалланиш қайд этилгани гумон қилинган жой ўрганилади. Тахмин тасдиғини топиши ёки аксинча, топмаслигига қараб, қолган тадбирлар амалга оширилади», — деган Отабеков.

Санитария-эпидемиология назорати давлат инспекцияси бошлиғи карантин тартибига риоя қилмаган шахслар маъмурий ва жиноий жавогарликка тортилиши мумкинлигини эслатган. Бироқ бунда асосий мақсад тадбиркорлик субъектларини касаллик тарқалишида асосий айбдор сифатида кўрсатиш эмаслигини қайд этган.

«Тадбиркорлик субъектларига касалланишга қарши барча чора-тадбирларни амалга оширганини исботлаши учун имконият берилади. Биринчидан, улар санитария-гигиена ва эпидемиологик талабларни бажариши лозим. Ушбу талабларни назорат қилувчи органлар ходимларнинг ушбу меъёрларга амал қилиш даражасини текширади. Ҳар бир тадбиркорлик субъектига алоҳида санитар врач ёки эпидемиолог бириктиришнинг иложи йўқ. Шу сабабли тадбиркорларга ўз корхоналарида кузатув камералари ўрнатишни тавсия қиламиз», — деган Нурмат Отабеков.