2020 йил 15 июндан бошлаб «сариқ» ва «яшил» тоифаларга ажратилган ҳудудлар ўртасида санитария-гигиена қоидаларига қатъий риоя этган ҳолда 7 та йўналишда поездлар қатновини қайта тиклашга рухсат берилди. Бу ҳақда «Ўзбекистон темир йўллари» компаниясининг матбуот хизмати хабар бермоқда.
Хабарга кўра, «Ўзтемир йўлйўловчи» акциядорлик жамияти рухсат берилган йўналишлар бўйича босқичма-босқич поездлар қатновини йўлга қўйишни бошлаган.
Ҳаракат жадвалига кўра:
15 июндан бошлаб Тошкент—Термиз—Тошкент йўналишидаги 80/79-рақамли йўловчи поездлари соат 19:30 да Тошкент жанубий вокзали ҳамда соат 18:57 да Термиз вокзалидан юра бошлаган;
Тошкент—Нукус—Тошкент йўналишидаги 54/53-рақамли йўловчи поездлари соат 14:16 да Тошкент жанубий вокзали ҳамда соат 16:12 да Нукус вокзалидан ҳаракатланган;
Тошкент—Хива—Тошкент йўналишидаги 56/55-рақамли йўловчи поездлари соат 21:00 да Тошкент Жанубий вокзали ҳамда соат 16:05 да Хива вокзалидан ҳар куни ҳаракатни амалга оширади.
Шунингдек, Тошкент—Самарқанд—Тошкент йўналиши бўйича санитария-эпидемиологик талабларга қатъий риоя этган ҳолда «Афросиёб» поездларининг қатновлари ҳам йўлга қўйилган.
Компания матбуот хизматининг қайд этишича, ҳаракати қайта тикланган поездларга чиқишда йўловчилар орасида ўрнатилган тартиб-қоидаларга, вокзаллар ҳамда санитария-эпидемиология маркази ходимларининг талабларига бўйсунмаслик ҳолатлари ҳам учраган.
«Фурсатдан фойдаланиб, барча йўловчилардан санитария-эпидемиологик талабларга қатъий риоя қилишларини сўраймиз. Агар ўзимизни ҳимоя қилиб, гигиена қоидаларига риоя қилиб, пандемияга қарши биргаликда курашсак, поездларимиз қатнови, хизмат кўрсатиш ҳеч қачон тўхтамайди», — дейилади баёнотда.
Мавзуга доир:
Изоҳ (0)