Sanitariya-epidemiologiya nazorati davlat inspeksiyasi boshlig‘i Nurmat Otabekov AOKA huzuridagi shtabda bo‘lib o‘tgan brifingda muhim savollarga javob qaytardi. Jumladan, u tadbirkorlik subyektlari zimmasiga yuklanayotgan qo‘shimcha mas’uliyat yuzasidan izoh berdi.

Xabaringiz bor, Respublika maxsus komissiyasining qarori bilan O‘zbekistonda karantin tadbirlari 1-avgustga qadar uzaytirilgan. 1-avgustgacha bo‘lgan vaqt mobaynida kuchaytirilgan davlat sanitariya nazoratini amalga oshirish haqida ham alohida topshiriq bor. Mazkur qarorda karantin cheklovlari sharoitida faoliyat yuritishiga ruxsat berilgan tadbirkorlik subyektlari (qurilish, umumiy ovqatlanish, xizmat ko‘rsatish obyektlari va boshqalar)ga tegishli obyektlarda belgilangan sanitariya-gigiyena talablariga rioya etmaslik oqibatida koronavirus infeksiyasi aniqlangan taqdirda ushbu obyektlarni va shaxslarni karantinga olish hamda saqlash bilan bog‘liq xarajatlar mazkur subyektlar hisobidan qoplanishi belgilangan.

O‘zbekistonda karantin va cheklov tadbirlari amal qilish barobarida tadbirkorlik subyektlari juda jiddiy sabr-matonatni namoyish qila oldi. O‘zbekiston Respublikasi, qolaversa, Toshkent shahri karantin tadbirlariga rioya etish bo‘yicha juda yuqori reytingda bo‘lib turdi. Albatta, bularning barchasi keyinchalik epidemik vaziyatda o‘z aksini topdi. Natijada respublikada koronavirus kasalligi bo‘yicha epidemik vaziyatni jilovlash imkoniyati paydo bo‘ldi.

Endi bir tasavvur qilaylik, hozirga qadar aniqlangan bemorlar soni 5 ming nafardan ziyodni tashkil etyapti. Mana shu kasallikka chalinganlarni karantinda saqlash, davolash, reabilitatsiya bilan bog‘liq xarajatlarning barchasi davlatimiz budjeti hisobidan qoplanyapti. Shu paytgacha bu xarajatlarning birortasi biror-bir tashkilot yoki tadbirkorlik subyektlari hisobidan qoplanmagan.

Qarorda belgilangan mazkur bandning aks etishidan asosiy maqsad ‘yashil’ va ‘sariq’ hududlarda joylashgan qurilish, umumiy ovqatlanish xizmati ko‘rsatishga ixtisoslashgan tadbirkorlik subyektlari mas’uliyatni to‘liq his qilishidir. Karantin tadbirlariga rioya etsin. Bu kabi tashkilotlar faoliyat ko‘rsatayotgan paytda, albatta, xodimlari doka niqobda bo‘lishini ta’minlasin. Umumiy ovqatlanish muassasalarida xizmat ko‘rsatuvchi shaxslarning qo‘lqopda va doka niqobda bo‘lishi ta’minlansin. Mijozlari oraliq masofa saqlashga rioya etishini nazorat qilsin. Har bir mijozdan keyin stol usti dezinfeksiya vositalari bilan ishlov berilsin.

Eng asosiy maqsad — kasallikning bir odamdan ikkinchi odamga yuqishiga yo‘l qo‘ymaslik. Respublikada og‘ir mehnatlar evaziga jilovlangan epidemik vaziyatni murakkablashtirib yubormaslik, yana karantin va cheklov tadbirlarini keskin va qattiq bo‘lishiga yo‘l qo‘ymaslik.

Nurmat Otabekov, Sanitariya-epidemiologiya nazorati davlat inspeksiyasi boshlig‘i

Shuningdek, brifingda koronavirus infeskiyasi tashuvchisini aniqlashda barcha vositalar, jumladan, kuzatuv kameralari safarbar qilinishi aytilgan.

“Epidemiologik surishtiruv vaqtida kasallanish qayd etilgani gumon qilingan joy o‘rganiladi. Taxmin tasdig‘ini topishi yoki aksincha, topmasligiga qarab, qolgan tadbirlar amalga oshiriladi”, — degan Otabekov.

Sanitariya-epidemiologiya nazorati davlat inspeksiyasi boshlig‘i karantin tartibiga rioya qilmagan shaxslar ma’muriy va jinoiy javogarlikka tortilishi mumkinligini eslatgan. Biroq bunda asosiy maqsad tadbirkorlik subyektlarini kasallik tarqalishida asosiy aybdor sifatida ko‘rsatish emasligini qayd etgan.

“Tadbirkorlik subyektlariga kasallanishga qarshi barcha chora-tadbirlarni amalga oshirganini isbotlashi uchun imkoniyat beriladi. Birinchidan, ular sanitariya-gigiyena va epidemiologik talablarni bajarishi lozim. Ushbu talablarni nazorat qiluvchi organlar xodimlarning ushbu me’yorlarga amal qilish darajasini tekshiradi. Har bir tadbirkorlik subyektiga alohida sanitar vrach yoki epidemiolog biriktirishning iloji yo‘q. Shu sababli tadbirkorlarga o‘z korxonalarida kuzatuv kameralari o‘rnatishni tavsiya qilamiz”, — degan Nurmat Otabekov.