Ўзбекистонда 14 июнь соат 23:00 дан 15 июнь соат 23:00 га қадар коронавирусни юқтириб олиш билан боғлиқ 183 та ҳолат қайд этилди. Бу бир кун давомида энг кўп касаллик аниқланиши бўйича Ўзбекистонда иккинчи натижа. 7 июнь куни 237 кишида коронавирус аниқланганди.

Фото: Telegram / @ssvmatbuotkotibi

Янги касалланиш ҳолатлари

Янги қайд этилган ҳолатларнинг

  • 144 таси карантин муассасаларидаги фуқаролар орасида;
  • 29 таси аҳоли орасида (Тошкент шаҳрида — 25 та, Самарқанд вилоятида — 3 та, Хоразм вилоятида — 1 та)
  • 10 таси Тошкент вилоятига хориждан кириб келган халқаро юк ташувчи автомашина ҳайдовчилари орасида аниқланган.

15 июнь куни янги касалланиш ҳолатлари Ўзбекистоннинг 7 та ҳудудида қайд этилди. Янги ҳолатларнинг асосий қисми Тошкент шаҳри ва вилояти ҳиссасига тўғри келди. Коронавирусга чалинганлар сони охирги 6 соатда кескин кўпайди. Соат 17:00 дан соат 23:00 гача 109 кишида коронавирус аниқланди.

Тошкент шаҳрида бир кун ичида аҳоли орасида 25 та ҳолат қайд этилди. Сўнгги кунларда пойтахтда аҳоли орасида коронавирус юқтириб олиш ҳолати аҳоли орасида 20 тадан ошмаётганди. Роппа-роса бир ҳафта аввал — 8 июнда Тошкентда аҳоли орасида 54 киши коронавирус юқтириб олганди. Ундан бир кун аввал эса Тошкентда 195 та ҳолат қайд этилганди. Пойтахтда июнь ойида фақат 3 июнь куни аҳоли орасида биронта ҳам касалликни юқтириб олиш ҳолати қайд этилмаганди.

Мавзуга доир: Ўзбекистонда метро фаолиятига нима учун рухсат берилмаётгани тушунтирилди

3 та янги ҳолат қайд этилган Самарқанд вилоятида 3 кун ўтиб яна аҳоли орасида касаллик юқтириб олиш ҳолати аниқланди. Хоразм вилоятида касаллик аниқланган 10 кишидан 1 нафари аҳоли орасида аниқланди. Вилоятда охирги марта 10 июнь куни аҳоли орасида коронавирус аниқланганди.

Бухоро, Навоий ва Наманган вилоятларида 15 июнда касалликни юқтириб олиш ҳолатлари коронавирусга чалинганлар билан мулоқотда бўлганлар орасида аниқланди.

Мавзуга доир: Ўзбекистонда «қизил», «сариқ» ва «яшил» тоифадаги ҳудудлар рўйхати янгиланди

Касалликдан даволаниш

15 июнь давомида 76 нафар фуқаро соғайди. Шундан 33 нафари Навоий вилоятидаги, 24 нафари Тошкент шаҳридаги, 17 нафари Самарқанд вилоятидаги, 2 нафари эса Андижон вилоятидаги тиббиёт муассасаларида шифо топди. Эндиликда коронавирусдан даволанган кишилар тўғридан-тўғри уйларига кузатилмоқда. 12 июндан бошлаб коронавирусдан соғайган беморларни реабилитацияга кузатиш тажрибасидан воз кечилган.

Апрель ойидан бери илк марта шифохоналарда даволанаётган беморлар сони 1200 нафардан ошиб кетди. Айни вақтда шифохоналардаги 1225 нафар бемордан 1026 нафари Тошкентдаги тиббиёт муассасаларида даволанмоқда (Сирдарё вилоятидаги беморлар ҳам Тошкент шаҳрига ўтказилган). Қолган 199 нафар бемор мамлакатнинг 9 ҳудудидаги шифохоналарда даволанмоқда.

Ҳозирда касаллик қайд этилган жами 5263 нафар бемордан 4019 нафари соғайиб, даволаниш кўрсаткичи 76 фоизни ташкил этмоқда. Бу борадаги кўрсаткич кетма-кет иккинчи кун 1 фоизга пасаймоқда.

Маълумот ўрнида, Жиззах ва Фарғона вилоятлари коронавирусдан холи ҳудуд бўлиб турибди. Қорақалпоғистонда 6, Андижонда 7, Сурхондарёда 9, Бухорода 15, Наманганда 16, Самарқандда 20, Хоразмда 24, Қашқадарёда 49 ва Навоийда 51 нафар бемор қолди.

Аҳволи оғир беморлар

Айни пайтда тиббиёт муассасаларида даволанаётган 1225 нафар бемордан 14 нафари оғир, 2 нафари эса ўта оғир аҳволда. Бир сутка аввал, ҳатто кундузги соат 10:00 да ҳам аҳволи оғир беморлар 12 нафар, аҳволи ўта оғир беморлар 2 нафар эди. Аҳволи оғир беморларнинг камида 1 нафари Сурхондарё вилоятида даволанмоқда.

15 мартда эпидемия бошланганидан бери Ўзбекистонда 19 нафар бемор COVID-19 асоратлари оқибатида вафот этган. Июнь ойининг ўзида 4 нафар бемор вафот этди.

Карантингадилар

Ҳозирда Ўзбекистонда уй карантинида 27 379 нафар, стационар карантинда эса 20 963 нафар фуқаро тиббий кузатувда бўлиб турибди. Бир кун ичида уй карантинидаги фуқаролар сони 918 нафарга, стационар карантиндаги фуқаролар сони 754 нафарга камайди.