Буюк Британия ўз ўтмишини қайтадан ёзмаслиги ва тарихини бузмаслиги лозим. Бу ҳақда мамлакат бош вазири Борис Жонсон 14 июнь куни чоп этилган Telegraph газетасидаги мақоласида таъкидлади. Шундай йўл билан у Уинстон Черчилль ҳайкалини олиб ташлашни талаб қилган ирқчиликка қарши ўтказилаётган норозилик намойишларининг чақириғига жавоб қайтарди.
«Агар биз архивларни тозалашни ва қарашларимизга мос келмайдиган расмларни ўчиришни бошласак, тарихни бузиб кўрсатиб, катта ёлғонларга ғарқ бўламиз», — деб ёзган у.
Унинг сўзларига кўра, Британия тарихи жуда мураккаб бўлиб, айни пайтда мамлакатдаги турли қарашлар ва ғоялар уйғунлашган. «Ҳа, Черчилль ўзининг узоқ йиллик фаолияти давомида турли хил сиёсий қарашлар тарафдори бўлган. Умуман олганда эса у вақт ўтиши билан ўзгарган», — деб қўшимча қилган бош вазир.
Жонсон ирқчилик рамзлари ва тарихни ўзгартириб кўрсатиш билан эмас, муаммонинг ўзи билан курашиш лозимлигини таъкидлади. Шу муносабат билан бош вазир ҳаётнинг турли соҳаларидаги тенгсизликнинг барча жиҳатларини кўриб чиқадиган ҳукуматлараро комиссия тузилганлигини эълон қилди.
«Келинглар, ирқчиликка қарши курашайлик, лекин меросларимизни тинч қўяйлик. Мамлакатда, дарвоқе, Уинстон Черчилль шарофати билан жорий этилган демократик воситалар ҳам бор», — дея сўзларини якунлаган у.
Эслатиб ўтамиз, ирқчиликка қарши норозилик намойишлари АҚШда афроамерикалик Жорж Флойднинг Миннеаполисда қўлга олиниши пайтида вафот этганидан кейин бошланди. Вақт ўтиши билан бу ҳаракатлар Европа мамлакатларида, жумладан, Буюк Британияда ҳам бошланди. Кўп ҳолларда норозилик намойишлари босқинчилик ва полиция билан тўқнашувлар билан якунланмоқда.
Изоҳ (0)