Жанубий Корея ҳукумати Шимолий Корея билан боғлиқ ҳар қандай вазият юзасидан жавоб беришга тайёрлигини таъкидлаб, КХДРни икки мамлакат ўртасидаги ҳарбий битим бўйича келишувларини амалга оширишга чақирди. Бу ҳақда «ТАСС» хабар бермоқда.
Тегишли баёнот мамлакат Мудофаа вазирлиги томонидан, Корея меҳнат партияси марказий қўмитаси бўлим бошлиғининг биринчи ўринбосари Ким Ё Чжон (КХДР етакчиси Ким Чен Иннинг синглиси) Пхеньян яқин келажакда Жанубий Кореяга нисбатан кейинги қадамни қўймоқчи эканлигини айтганидан сўнг, эртаси куни эълон қилинган.
Қайд этилишича, мамлакатлар ўртасида тузилган битимга амал қилиш лозимлигини бирлашган вазирлик ҳам таъкидлаган. 14 июнь куни Жанубий Кореянинг хавфсизлик масалалари бўйича жавобгар бўлган юқори мартабали расмийлари Пхеньян таҳдидларини муҳокама қилиш учун фавқулодда йиғилиш ўтказган.
Эслатиб ўтамиз, узоқ йиллар давомида ишламаган алоқа линиялари 2018 йилда қайта тикланган эди. Шундан сўнг мамлакатлар кунига икки маротаба ўзаро қўнғироқлашиб турган. Пхеньянга қарши юборилган ташвиқот варақалари сабаб КХДР ҳукумати 2020 йил 9 июнь куни Жанубий Корея билан мавжуд барча алоқа каналларини тўхтатди. Шимолий Кореяга ҳатто ҳарбий алоқа линиялари орқали ҳам қўнғироқ қилишнинг имкони бўлмаган. Бундан ташқари, икки Корея бирлашган ишлари бўйича вазирлиги ҳам алоқани ўрната олмаган.
2018 йил 27 апрель куни икки давлат раҳбарлари Ким Чен Ин ва Мун Чже Ин Пханмунджом саммити якунларига кўра тинчлик, фаровонлик ва Корея яриморолини бирлаштириш тўғрисида қўшма декларация имзолаган. Унда яриморолни тўлиқ ядросизлантириш, икки мамлакат ўртасида қатъий тинчлик шартномасини имзолаш ва гуманитар соҳада ҳамкорликни янада ривожлантиришга оид мақсадлар кўзда тутилган.
Ушбу мақсадлар ўша йилнинг сентябрида Пхеньянда ўтказилган саммитда ҳам тасдиқланган, бироқ ҳалигача амалга ошмади.
Мавзуга доир: Жанубий Корея ва КХДР чегарасида отишма содир бўлди
Изоҳ (0)