Россияда коронавирусга иммунофермент таҳлил орқали тест топширган салкам 650 минг одамнинг 14 фоизида иммунитет аниқланган. Бу ҳақда мамлакат бош вазир ўринбосари Татьяна Голиковага таяниб, «Интерфакс» хабар берди.
Унинг сўзларига кўра, тест топширганларнинг асосий қисми — 88 фоизи Москва ҳисобига тўғри келмоқда, бироқ ҳозирга келиб скринингга Россиянинг жами 47 минтақаси ҳам қўшилган.
«Ҳозирда Роспотребнадзор Россия таркибий тузилмаларида популяцион тадқиқотларни ўтказишга фаол тайёргарлик кўрмоқда. Умид қиламизки, бу вирус популяциямизга қанчалик чуқур кириб борганини ва аҳолимиз қанчалик табиий усулда ҳимояланганини аниқлашимизда ёрдам беради», — дейди Голикова.
Бош вазир ўринбосарининг сўзларига кўра, минтақалар тест жараёнларини Москвадан кейин бошлаётганига сабаб, вилоятлар ҳудудига касаллик пойтахтдан кейин кириб борган.
Голикова, шунингдек, Москвадаги шифохоналарнинг тиббиёт ходимлари ҳам иммунофермент таҳлил усули орқали тест топшираётганига тўхталиб ўтган. Унинг таъкидлашича, биринчи босқичда 60 та муассасадаги 15,5 минг тиббиёт ходими текширилган бўлиб, уларнинг 16,5 фоизида антитана аниқланган. Қайта текширувлар давомида антитаналар 32,4 фоизида аниқланган, хусусан, уларнинг 21 фоизида яна бир бор топилган бўлса, 11,4 фоизида эса — биринчи бор антитана аниқланган.
Сўнгги маълумотларга кўра, Россияда коронавирус билан касалланганлар сони 520 минг кишидан ошди. Ҳозирга қадар мамлакатда 274 мингдан ортиқ бемор соғайган бўлса, 6829 киши COVID-19 қурбонига айланган.
Аввалроқ ЖССТ вакили Россияда коронавирус қурбонлари сонининг камлигини ноодатий деб атаган эди.
Изоҳ (0)