Россияда коронавирусга чалинганлар сони 510 минг кишидан ошди

Россияда сўнгги суткада коронавирусга чалиниш бўйича 8987 та ҳолат қайд этилди, деб хабар бермоқда Meduza коронавирусга қарши кураш бўйича тезкор штабнинг 12 июнь куни берган маълумотларига таяниб.

Мамлакатда умумий ҳисобда 511 423 киши коронавирусга чалинган.

Янги касалланиш ҳолатларининг энг кўпи Москва шаҳри (1714 та), Москва вилояти (730), Свердлов вилояти (320) ва Санкт-Петербургда (274) қайд этилган.

Сўнгги суткада беморларнинг 183 нафари вафот этган бўлиб, мамлакатда эпидемия бошланганидан буён COVID-19 қурбонларининг жами сони 6715 кишига етди.

Шунингдек, сутка давомида беморларнинг 8220 нафари тузалган бўлиб, соғайганларнинг умумий сони 269 370 кишини ташкил этмоқда.

Мамлакатда коронавирусни аниқлаш бўйича сўнгги суткада 343 мингта, эпидемия бошланганидан буён эса 14,2 миллионта тест ўтказилган.

Эслатиб ўтамиз, Россияда кунлик касалланишлар сони 11 июнь куни 8779 та, 9 июнь куни 8595 та, 8 июнь куни эса 8985 тани ташкил этганди.