Украина президенти Владимир Зеленскийнинг рафиқаси Елена Зеленскаяда коронавирус аниқланди. Бу ҳақда 12 июнь куни Президент офиси маълум қилди.
Қайд этилишича, Украинанинг биринчи хонимининг коронавирусга топширган тести ижобий чиққан. Шунга қарамай, ўзини яхши ҳис қилмоқда ва унда касаллик белгилари кузатилмаяпти. Айни пайтда Елена Зеленская бошқа оила аъзоларидан ажратилган ҳолда амбулатория шароитида даволанмоқда.
Владимир Зеленскийнинг ўзи ва фарзандлари ҳам тестдан ўтган бўлиб, уларда вирус аниқланмаган.
Таъкидланишича, биринчи хоним уйда ва ишчи учрашувларда Соғлиқни сақлаш вазирлигининг карантин қоидалари ва тавсияларига доим риоя қилган, COVID-19’ни аниқлаш бўйича тестдан мунтазам ўтиб турган. Июнь ойида ўтказилган тест натижалари салбий чиққан.
У қачон ва қаерда вирус юқтириб олгани ҳозирча номаълум — эпидемиологик текширув ўтказилмоқда. Елена Зеленская билан мулоқотда бўлганларнинг барчаси инфекция хавфи ҳақида хабардор қилинган. Уларга ҳам ўзларини изоляция қилиш ва имкон қадар тестдан ўтиш тавсия қилинган.
Эслатиб ўтамиз, бир неча кун олдин Владимир Зеленский халқини қўллаб-қувватлаш учун коронавирусни юқтиришга тайёрлигини билдирганди.
Айни пайтда Украинада қарийб 30 минг кишида коронавирус аниқланган, 870 киши касаллик асоратларидан вафот этган.
Изоҳ (0)