Аҳолисининг 31 фоизи меҳнат мигранти бўлган Сўхда пандемия сабабли 14 мингга яқин киши ишсиз қолгани маълум қилинди

Фарғона вилояти Сўх тумани аҳолисининг 31 фоизи хорижий мамлакатларда меҳнат мигранти бўлиб ишлайди. Бу ҳақда туман ҳокими Сайидбаҳром Сайидмусаев маълум қилди.

Ҳокимнинг сўзларига кўра, Чашма булоғида рўй берган можародан сўнг барча вазирликлар тумандаги ҳар бир маҳаллада пиёда юриб, йиллар давомида тўпланиб қолган муаммоларни ўрганди, аҳолининг дардини эшитди. Оғриқли нуқталар аниқланиб, уларнинг таклифлари асосида дастур ишлаб чиқилди.

Таъкидланишича, туманда аҳоли боғдорчилик, деҳқончилик ва чорвачилик билан шуғулланади. Аҳолининг 31 фоизи хорижий мамлакатларда мигрант бўлиб ишлайди. Коронавирус пандемияси сабабли туманда 14 мингга яқин аҳоли ишсиз қолган.

Бугунги кунда биринчи навбатда, уларни иш билан таъминлаш, даромад топишига кўмаклашиш бўйича иш олиб борилмоқда. 500 нафардан ортиқ сўхлик Tashkent City’даги қурилиш объектларида иш билан таъминланмоқда. Уларнинг барча харажатларини давлат ўз зиммасига олмоқда. Туманда бошланган бунёдкорлик ишларида эса электр соҳасида 200 нафар, қурилишда 300 нафар фуқаро ишга жойлаштирилган.

Қайд этилишича, туман аҳолисини узлуксиз озиқ-овқат маҳсулотлари билан таъминлаш — доимий эътибордаги масала. Вилоят марказидан олиб келинадиган асосий маҳсулотлар қўшни давлатнинг 80 километр чегарасини босиб ўтади.

Тумандаги катта бир муаммолардан бири ичимлик суви ва ерларни суғориш билан боғлиқ. Ҳокимнинг билдиришича, бу масала ҳам ижобий ечимини топиб, 90 фоиз аҳоли ичимлик суви билан таъминланади. Электр энергияси таъминотини яхшилаш ишлари бошлаб юборилган.

Маълумот учун, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳолиси ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққан. Қирғизистоннинг Боткен вилоятида уй ва омборхона ёниб кетган.

Ушбу ҳолат юзасидан 1 июнь куни Ўзбекистон бош вазири Абдулла Арипов Ўзбекистон—Қирғизистон чегарасида қўшни мамлакат ҳукумати раҳбари билан учрашди. Бундан ташқари, Президент Шавкат Мирзиёев Қирғизистон президенти Сўронбой Жээнбеков билан телефон орқали мулоқот қилди.

Мазкур воқеалар ортидан Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрди. Сўх туманига янги ҳоким ва ички ишлар бўлимига янги раҳбар тайинланди.