Швеция ва Беларуснинг COVID-19 пандемияси вақтида қаттиқ карантин чораларини жорий қилмагани оқилона қарор бўлмаган ва бу мамлакатларга катта зарар етказди. Бу ҳақда Италиянинг Падуи университети молекуляр тиббиёт кафедраси профессори, вирусолог Андреа Крисанти маълум қилди, деб ёзмоқда «РБК».
«Ўйлашимча, бу Швеция учун шошма-шошарлик билан қабул қилинган қарор бўлди. Бу қарор Швеция учун қимматга тушади. У ерда вирус сабабли кўп одам вафот этди, уни юқтириш даражаси эса пасайгани йўқ. Бу қарорнинг оқибати сифатида қўшни давлатлар Швеция билан чегараларни ёпмоқда», — дея маълум қилган вирусолог.
Мавзуга доир: Коронавирусга қарши қатъий чекловлар жорий этишдан воз кечган Швеция жиддий иқтисодий қийинчиликка дуч келди
Швеция бош эпидемиологи Андерс Тегнелл 3 июнь куни карантиндан воз кечилгани сабабли мамлакатда жуда кўп одам вафот этганини тан олди. У мамлакат ўз сиёсатини қайта кўриб чиқиши ва кескинроқ карантин чораларини кўриши кераклигини маълум қилган.
«Агар биз ҳозир эга бўлган билимимиз билан мазкур касалликка дуч келганимизда Швеция танлаган ва қолган бутун дунё танлаган усуллар ўртасидаги мақбулини танлаган бўлардик», — деганди Тегнелл.
Мавзуга доир: Швециянинг бош эпидемиологи мамлакатда карантиндан воз кечиш хато бўлганини биринчи марта тан олди
«Бошқа чекловларга келсак, чегараларни ёпиш — бу бефойда машғулот. Мактабларни ёпиш ўз ортидан ҳеч қандай оқибатларни келтириб чиқармайди. Одамларга кўчага чиқишни тақиқлаш? Бу аҳмоқлик, бундай тақиқларнинг илмий асоси йўқ», — дея таъкидлаган Гизеке.
Шунингдек, Гизеке кўплаб бошқа швециялик ҳамкасблари каби аҳоли касалликка қарши «жамоавий иммунитет» орттириши кераклиги ва бунинг учун аҳолининг 60 фоизи касаллик билан оғриши кераклигини айтган.
Сўнгги маълумотларга кўра, Швецияда COVID-19 касаллигига чалинганлар сони 45 924 кишини ташкил қилмоқда, улардан 4717 нафари касаллик оқибатида вафот этган.
Пандемияга қарши курашда Швециянинг стратегиясига ўхшаш стратегия Беларусь ҳукумати томонидан ҳам қўлланилди. Мамлакат кескин карантин чораларини жорий этмади. 6 июнь куни Александр Лукашенко бу қарорни ижобий баҳолади. Шу билан бирга, 25 май куни Беларусь президенти мамлакатда касалликнинг иккинчи тўлқини юз бериши мумкинлигини айтган.
Беларусь Соғлиқни сақлаш вазирлиги маълумотларига кўра, 8 июнь ҳолатига кўра, мамлакатда 49 453 нафар фуқаро коронавирусга чалинган, 276 киши касаллик қурбонига айланган.
Изоҳ (0)