2020 йилда коронавирус пандемияси оқибатида авиакомпанияларнинг соф фойдаси 84 миллиард долларга қисқаради. Бу ҳақда Халқаро ҳаво транспорти ассоциацияси (IATA) прогнозида маълум қилинган.
Авиакомпанияларнинг фойдаси 50 фоизга пастлайди ва 2019 йилдаги билан таққослаганда 838 миллиард долларлик даромад 419 миллиардгача тушиб кетади. 2021 йилда ҳам аввалги кўрсаткичларни тиклаб бўлмайди. IATA прогнозига кўра, авиакомпаниялар келаси йили 598 миллиард доллар даромад қилиши мумкин.
«Молиявий жиҳатдан олиб қараганда, 2020 йил авиация тарихидаги энг ёмон давр бўлади», — дейди IATA раҳбари Александр де Жюньяк.
Шунингдек, у авиақатновлар саноати кунига 230 миллион доллар йўқотаётганини ҳам қўшимча қилган.
Мавзуга доир:
Эслатиб ўтамиз, 2020 йил 16 март куни Uzbekistan Airways маҳаллий ва халқаро авиақатновларни бекор қилган, кейинчалик бекор қилинган рейслар учун чипталарни топширишда жарималар ва санкциялар бўлмаслигини билдирган. 2 майда Uzbekistan Airways ижроия органига Ўзбекистон ташқи иқтисодий фаолият миллий банкидан олинган 111 миллион АҚШ доллари миқдоридаги кредит тўловини 2020 йилда вақтинча тўхтатиб туриш масаласини кўриб чиқиш топширилган. Қарор ягона акционер — давлат томонидан 30 апрелда қабул қилингани ҳақида хабар берилган. Карантин чораларини енгиллаштириш доирасида 18 майдан бошлаб Ўзбекистоннинг бир қатор шаҳарларига авиа ва темир йўл қатновлари қайта тикланди.
Ўзбекистон Президенти Шавкат Мирзиёев 2020 йил 25 май куни транспорт соҳасининг барқарор ишлашини таъминлаш ва изчил ривожлантириш масалалари бўйича ўтказган йиғилишида карантиндан энг кўп зарар кўрадиган Uzbekistan Airways ва Uzbekistan Airports акциядорлик жамиятларининг 122 миллион доллар кредитлари тўлов муддатлари узайтирилгани, 60 миллиард сўмлик солиқ имтиёзлари тақдим этилгани, инқирозга қарши курашиш жамғармасидан 50 миллион доллар миқдорида айланма маблағ сифатида фоизсиз ссудалар ажратилгани маълум қилинди. Шунингдек, Ўзбекистондаги 4 та аэропортни давлат-хусусий шерикликка, Uzbekistan Airways’ни хорижий компания бошқарувига бериш режалаштирилгани айтилди.
28 майда Uzbekistan Airways компанияси «Ми-8МТВ-1» русумли иккита вертолётни, «ТВ3-117 ВМ» русумли саккизта ва «ВСУ АИ-9В» русумли учта авиацион двигателни сотувга қўйгани хабар қилинди.
Изоҳ (0)