Хитойда коронавирусга чалинганлар сони бир суткада 11 нафарга, Жанубий Кореяда эса 45 нафарга ошди

Хитойда сўнгги суткада коронавирус билан касалланиш бўйича 11 та ва касаллик белгисиз ўтаётган 4 та ҳолат аниқланди. Беморларнинг 4 нафари соғайди, вафот этиш ҳолатлари қайд этилмади, деб хабар бермоқда «РИА Новости» Хитой Соғлиқни сақлаш миллий комиссиясига таяниб.

Қайд этилишича, янги касалланиш ҳолатларининг барчаси четдан юқтирилган. Мамлакатда умумий ҳисобда 83 057 киши коронавирусга чалинган. Беморларнинг 78 361 нафари соғайган, 4 634 нафари вафот этган. Касалхоналарда 62 нафар бемор қолмоқда.

Шунингдек, сутка давомида 4 киши инфекцияни белгисиз ташувчи сифатида қайд этилган. Шундай кишиларнинг яна 129 нафари шифокорлар назоратида бўлиб турибди.

Жанубий Кореяда эса сутка давомида 45 киши коронавирусга чалингани қайд этилиб, касалланганларнинг умумий сони 11 947 нафарга етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб.

Қайд этилишича, касалланганларнинг 40 нафари вирусни мамлакатнинг ўзида, 5 нафари четдан юқтирган.

Сўнгги суткада 43 киши коронавирусдан соғайиб, тузалганларнинг умумий сони 10 654 нафарга етди. Касалликдан яна икки киши вафот этиб, қурбонлар сони 276 кишига етди.

Жанубий Кореяда коронавирусни аниқлаш бўйича қарийб 1,06 миллионта тест ўтказилган.