АҚШ тоғларида 10 йил аввал яшириб қўйилган 1 млн долларлик хазина топилди

АҚШдаги Еллоустоун миллий парки ҳудудидаги Rocky Mountains тоғларига бир вақтлар коллекционер Форрест Фенн яшириб қўйган қиймати бир миллион долларга тенг бўлган хазина топилди. Бу ҳақда Феннинг ўзи CBS News’га маълум қилган.

Қутига қимматбаҳо тошлар, тилла тангалар ва заргарлик буюмлари солинган. Фенн бу ҳақда 2010 йилда нашр этган таржимаи ҳолида маълум қилган. У хазинани 1990 йил охирида саратон касаллигига чалинганини билгач, яширишга қарор қилган. У шу йўл билан тарихда қолмоқчи эди. Касалликнинг ривожланишига йўл қўйилмаган, лекин Фенн барибир ўз ғоясини амалга оширган.

Унинг айтишича, сандиқни топган одам у билан боғланган. Хазинани топганининг исботи сифатида суратлар ҳам юборган. Аммо ўз шахсини эълон қилишни истамаган. Хазина изловчига бойликларни топишда коллекционер китобидаги шеърда келтирилган ишора ёрдам берган.

Китобда жами 9 та калит сўз яширинган бўлиб, уларни топган одам хазина қаерда эканини аниқлаши мумкин эди. Минглаб одамлар бойликни излашга тушган. Унинг сўзларига кўра, сандиқча хавфсиз ерга беркитилган, аммо уни излашда эҳтиёткор бўлиш талаб қилинади.

CBS журналистининг хазина топилганидан кейин коллекционер ўзини қандай ҳис этаётгани ҳақида берган саволига 87 ёшли Фенн қуйидагича жавоб қайтарган:

«Аниқ бир нарса дейишим қийин. Бир томондан хурсандман, бошқа томондан олиб қараганда эса ушбу саргузашт қисса якунига етди».

2018 йил февраль ойида 2017 йилнинг июнь ойи бошида Еллоустоун миллий боғида иллинойслик 53 ёшли Жефф Мерфининг ғойиб бўлгани, у икки километрга яқин Turkey Pen Peak тоғига чиқиб, 152 метр баландликдан тушиб кетиб, ҳалок бўлгани тахмин қилинаётгани ҳақида хабар берилган эди.

Жефф Мерфи миллионер Форрест Фенн томонидан кўмилган хазинани қидириш вақтида ҳалок бўлганлиги маълум қилинган. У хазинани топиш йўлида ҳалок бўлганларнинг биринчиси эмас эди.