AQSh tog‘larida 10 yil avval yashirib qo‘yilgan 1 mln dollarlik xazina topildi

AQShdagi Yelloustoun milliy parki hududidagi Rocky Mountains tog‘lariga bir vaqtlar kolleksioner Forrest Fenn yashirib qo‘ygan qiymati bir million dollarga teng bo‘lgan xazina topildi. Bu haqda Fenning o‘zi CBS Nerws’ga ma’lum qilgan.

Qutiga qimmatbaho toshlar, tilla tangalar va zargarlik buyumlari solingan. Fenn bu haqda 2010-yilda nashr etgan tarjimayi holida ma’lum qilgan. U xazinani 1990-yil oxirida saraton kasalligiga chalinganini bilgach, yashirishga qaror qilgan. U shu yo‘l bilan tarixda qolmoqchi edi. Kasallikning rivojlanishiga yo‘l qo‘yilmagan, lekin Fenn baribir o‘z g‘oyasini amalga oshirgan.

Uning aytishicha, sandiqni topgan odam u bilan bog‘langan. Xazinani topganining isboti sifatida suratlar ham yuborgan. Ammo o‘z shaxsini e’lon qilishni istamagan. Xazina izlovchiga boyliklarni topishda kolleksioner kitobidagi she’rda keltirilgan ishora yordam bergan.

Kitobda jami 9 ta kalit so‘z yashiringan bo‘lib, ularni topgan odam xazina qayerda ekanini aniqlashi mumkin edi. Minglab odamlar boylikni izlashga tushgan. Uning so‘zlariga ko‘ra, sandiqcha xavfsiz yerga berkitilgan, ammo uni izlashda ehtiyotkor bo‘lish talab qilinadi.

CBS jurnalistining xazina topilganidan keyin kolleksioner o‘zini qanday his etayotgani haqida bergan savoliga 87 yoshli Fenn quyidagicha javob qaytargan:

“Aniq bir narsa deyishim qiyin. Bir tomondan xursandman, boshqa tomondan olib qaraganda esa ushbu sarguzasht qissa yakuniga yetdi”.

2018-yil fevral oyida 2017-yilning iyun oyi boshida Yelloustoun milliy bog‘ida illinoyslik 53 yoshli Jeff Merfining g‘oyib bo‘lgani, u ikki kilometrga yaqin Turkey Pen Peak tog‘iga chiqib, 152 metr balandlikdan tushib ketib, halok bo‘lgani taxmin qilinayotgani haqida xabar berilgan edi.

Jeff Merfi millioner Forrest Fenn tomonidan ko‘milgan xazinani qidirish vaqtida halok bo‘lganligi ma’lum qilingan. U xazinani topish yo‘lida halok bo‘lganlarning birinchisi emas edi.