Ўзбекистон Президенти Шавкат Мирзиёев 9 июнь, сешанба куни миллий иқтисодиёт барқарорлигини таъминлашга доир долзарб масалалар муҳокамасига бағишланган йиғилиш ўтказди. Бу ҳақда Президент матбуот хизмати хабар берди.
Маълум қилинишича, ўтган уч ойда мамлакатда иқтисодиёт тармоқларига 2,3 триллион сўм солиқ имтиёзлари берилди, Инқирозга қарши курашиш жамғармасидан 3,6 триллион сўм ажратилди.
Мавзуга доир: Коронавирус Ўзбекистон давлат бюджетига 2020 йилнинг 3 ойида қандай таъсир кўрсатгани маълум бўлди
- биринчи — иқтисодиёт ва бюджет барқарорлигини таъминлаш;
- иккинчи — камбағалликни қисқартириш ва аҳоли бандлигини ошириш;
- учинчи — банк тизимидаги ислоҳотларни жадаллаштириш;
- тўртинчи — тўғридан-тўғри хорижий инвестицияларни кўпайтириш;
- бешинчи — экспорт салоҳиятини ошириш ва валюта тушумларини таъминлаш;
- олтинчи — саноатда рақобатбардошликни кучайтириш;
- еттинчи — кичик бизнесни ривожлантириш;
- саккизинчи — рақамли технологияларни барча тармоқларда кенг жорий қилиш.
Иккинчи йўналиш бўйича бу йил 810 мингта доимий иш ўрнини қайта тиклаш, 310 минг доимий ва 633 мингта мавсумий иш ўрни яратиш зарурлиги таъкидланди.
Йиғилишда банк тизимидаги ислоҳотларни жадаллаштириб, давлат улушига эга ўнта банкда трансформация жараёнини ўз вақтида амалга ошириш, фоиз ставкаларини инфляцияга қарши сиёсат билан уйғунлашган ҳолда пасайтириш муҳимлиги таъкидланди.
2020 йилда тўғридан-тўғри хорижий инвестицияларни жалб этиш ва ўзлаштириш бўйича бош вазир ўринбосарларига топшириқлар берилди.
Пандемия шароитида экспортни ошириш ва валюта тушумларини таъминлаш — жуда долзарб масала. Ташқи бозорларда талабнинг кескин камайиши экспортчи корхоналарга жиддий таъсир қилмоқда.
Шу муносабат билан, бешинчи устувор йўналиш сифатида Инвестициялар ва ташқи савдо вазирлигига экспорт кўрсаткичини 2019 йилгидан кам бўлмаган миқдорда таъминлаш бўйича қўшимча чоралар кўриш юзасидан топшириқлар берилди.
Йиғилишда саноатни ривожлантириш масалаларига ҳам алоҳида эътибор қаратилди. Айрим тармоқларда хом ашёни чуқур қайта ишлаш ва қўшимча қийматли маҳсулотлар ишлаб чиқаришнинг яхлит занжири яратилмагани кўрсатиб ўтилди.
Шу боис замонавий технологиялар трансферини йўлга қўйиш, тармоқларнинг энергия самарадорлиги ва рақобатдошлигини оширишни назарда тутувчи Саноат сиёсати стратегиясини ишлаб чиқиш зарурлиги таъкидланди.
Кимё, тўқимачилик, қурилиш материаллари, автомобилсозлик, электр техникаси ҳамда озиқ-овқат саноатларига алоҳида эътибор қаратиш, давлат корхоналарини ислоҳ қилиш жараёнларини жадаллаштириш бўйича кўрсатмалар берилди.
Мамлакатда кичик бизнес иқтисодиётнинг ўсиш нуқтаси этиб белгиланган. Йиғилишда тадбиркорларга эркин рақобат муҳитини яратиш учун хусусий мулкчиликни ҳимоя қилишга қаратилган суд-ҳуқуқ тизимини ислоҳ этиш зарурлиги таъкидланди.
Юқори технологияли тармоқларда кичик бизнес ҳиссаси камлиги қайд этилиб, бундай субъектларни давлат томонидан рағбатлантириш механизмини ишлаб чиқиш вазифаси қўйилди. Ҳудудларда кичик саноат зоналари ташкил этиш бўйича топшириқлар берилди.
Президент ҳузурида 8 июнь куни ўтказилган тақдимот чоғида рақамли технологияларни тезкор ривожлантириш, уларни барча тармоқларда кенг жорий қилиш вазифалари келишиб олинган эди. Бу борадаги ишларни белгиланган саккизинчи устувор йўналишга мувофиқ ташкил қилиш лозимлиги кўрсатиб ўтилди.
Йиғилишда мутасадди раҳбарлар иқтисодиётни ривожлантириш бўйича қисқа ва ўрта муддатда амалга ошириладиган ишлар юзасидан ўз таклифларини билдирди.
Маълумот учун, коронавирус пандемияси сабабли вужудга келган глобал инқироз барча мамлакатлар иқтисодиётига жиддий таъсир кўрсатяпти. Жаҳон банкининг прогнози бўйича 2020 йилда ялпи глобал маҳсулот 5,2 фоизга, АҚШда ялпи ички маҳсулот 6,1 фоизга, Россияда 6 фоизга, Европа Иттифоқида 9,1 фоизга тушиши кутилмоқда. Шу билан бирга, Хитойда 1 фоиз, Ўзбекистонда эса 1,5 фоиз иқтисодий ўсиш бўлиши тахмин қилинмоқда. Ўзбекистон Марказий банки ҳам 2020 йилда мамлакатда иқтисодий ўсиш 1,5 фоизни ташкил қилишини тахмин қилган.
Изоҳ (0)