Ўзбекистон Президентининг 2020 йил 20 майдаги «Ҳар бир оила—тадбиркор» дастурини молиялаштиришга доир қўшимча чора-тадбирлар тўғрисида»ги қарорига асосан оилавий тадбиркорликни ривожлантириш ва аҳоли бандлигини таъминлаш мақсадида «Агробанк», «Микрокредитбанк» ва Халқ банкига Ўзбекистон Тикланиш ва тараққиёт жамғармаси томонидан ажратилиши кўзда тутилган 1 триллион сўмнинг 500 миллиард сўми ажратилди ҳамда мазкур банкларнинг жойлардаги филиалларига етказилди. Бу ҳақда Марказий банк томонидан маълум қилинди.
Марказий банк томонидан хабар берилишича, маблағларни ўзлаштириш даражасидан келиб чиққан ҳолда жамғарма ҳисобидан оилавий тадбиркорликни ривожлантириш давлат дастурлари доирасида яна 500 миллиард сўм ажратилиши белгиланган.
Мавзуга доир: Шавкат Мирзиёев Марказий банкка кредитлаш шартларини соддалаштириш бўйича топшириқ берди
Механизмга кўра, маҳсулотларни етказиб берувчи (хизматлар кўрсатувчи) таъминотчилар рўйхатини тасдиқлаш амалиёти бекор қилинди ва фақат наслли чорва моллари (қорамол, қўй, эчки) етказиб берувчилар рўйхати уларнинг етарлича имкониятлари мавжудлиги инобатга олинган ҳолда тасдиқланади.
Туман сектори раҳбарлари ўзларига бириктирилган ҳудудларда кредит олиш истагини билдирган шахсларнинг тадбиркорлик ташаббусларини ўрганиб, уларни молиялаштириш учун тавсиянома беради.
Базавий ҳисоблаш миқдорининг 1000 баробаригача кредит ажратишга вилоят марказлари томонидан хулоса берилиши талаб этилмаган ҳолда, туман (шаҳар) марказларининг хулосалари қабул қилинади ҳамда ушбу хулосалар туман (шаҳар) ҳокимларининг биринчи ўринбосари ва тегишли банк филиали бошқарувчиси томонидан белгиланган тартибда маъқулланиши етарли ҳисобланади.
Кредит маблағлари қарз олувчилар томонидан эркин тарзда тузилган шартномаларга асосан маҳсулот ва ускуна етказиб берувчи (хизмат кўрсатувчи)нинг ҳисоб рақамига ўтказиб берилади.
Қайд этилишича, оилавий тадбиркорликни ривожлантириш давлат дастурлари доирасида кредитлар ажратишда туман марказлари томонидан хулосалар ҳудуд учун белгиланган ресурс маблағлари доирасида берилади. Дастур доирасида ажратиладиган маблағларнинг 70 фоизи кафолатланган янги иш ўринлари яратишни кўзда тутувчи кичик ва ўрта бизнес лойиҳаларига, 30 фоизи устувор равишда уй шароитида ўзини ўзи банд қилиш, хусусан, аҳолининг томорқасидан унумли фойдаланиш ҳамда уй шароитида ҳунармандчиликни ривожлантиришга йўналтириш мўлжалланмоқда.
Кредитлар ҳудудларни ижтимоий-иқтисодий ривожлантиришда ва камбағалликни қисқартиришда ҳиссаси юқори бўлган (устувор равишда ижтимоий ҳимояга муҳтож ва ишсиз фуқароларни даромадли меҳнат ҳамда янги иш ўринлари билан банд қилишга қаратилган) лойиҳаларни молиялаштириш учун йўналтирилишига ҳамда ажратилган кредитларнинг мақсадли ишлатилиши ва самарадорлиги таъминланишига алоҳида эътибор қаратилади.
Аввалроқ Ўзбекистонда ўзини ўзи банд қилган шахслар шуғулланиши мумкин бўлган фаолият турлари кўпайгани ҳақида хабар берилганди.
Изоҳ (0)