Xitoylik olimlar koronavirus ko‘rshapalaklarda paydo bo‘lganini tasdiqladi, biroq u odamga boshqa hayvondan yuqqan
COVID-19 pandemiyasini keltirib chiqargan SARS-CoV-2 koronavirusining asosiy manbayi Uxandagi dengiz mahsulotlari bozori emas. Daily Mail’ning yozishicha, bu haqda Xitoy Kasalliklarni nazorat qilish va oldini olish markazi ma’lum qilgan.
Uxandagi dengiz mahsulotlari bozoridagi hayvonlardan olingan namunalarning genetik tadqiqoti ularda COVID-19 yo‘qligini, demak, ular infeksiya manbayi bo‘lolmasligini ko‘rsatgan.
Markaz direktori Gao Funing so‘zlariga ko‘ra, bozor koronavirus sababchisi emas, balki uning “qurbonlaridan biri” bo‘lgan. Shu bilan birga, xitoylik olimlar o‘tkazgan tadqiqot natijalari virus ko‘rshapalaklarda paydo bo‘lgani haqidagi taxminni tasdiqladi. Ammo u odamga “oraliq hayvon” orqali yuqqan. Birinchi bemor kasallangan joyning manzili esa noma’lum.
Jorjtaun universiteti zoologi Kolin Karlsonning ta’kidlashicha, Uxan dengiz mahsulotlari bozori koronavirusning keng tarqaladigan joyiga aylangan — bir kishi birdaniga ko‘plab odamlarga kasallik yuqtirgan.
26-may kuni JSST koronavirusning kelib chiqishini o‘rganish uchun Xitoyga missiya yuborishini ma’lum qilgandi. Unda turli davlatlardan kelgan vakillar ham bo‘ladi. JSSTning favqulodda vaziyatlar dasturi rahbari Mayk Rayanning aytishicha, Xitoy hukumati chet ellik olimlarga virusning kelib chiqishini aniqlashga yordam berishga tayyorligini bildirgan.
Eslatib o‘tamiz, AQShning Fox News telekanali koronavirusning Uxanda laboratoriya sharoitida yaratilganini taxmin qilgan. Donald Tramp ham koronavirus laboratoriyada yaratilganini isbotlovchi dalillari borligini bildirgan. AQSh davlat kotibi Maykl Pompeo Xitoy kasallik tarqalishi yuzasidan muhim axborotga ega bo‘lgani, ammo uni o‘z vaqtida oshkor qilmaganini aytgan.
Bunga javoban JSST AQSh koronavirus laboratoriyada yaratilgani to‘g‘risida hech qanday ma’lumot taqdim etmaganini, koronavirus Xitoy laboratoriyalarida paydo bo‘lgani to‘g‘risidagi bayonotni spekulyativ deb aytgan.
Avstraliyaning The Daily Telegraph nashri AQSh, Buyuk Britaniya, Kanada, Avstraliya va Yangi Zelandiya maxsus xizmatlarini birlashtiruvchi “Besh ko‘z” razvedka alyansi tomonidan tayyorlangan 15 varaqli hisobotga tayanib, Xitoy COVID-19 koronavirus infeksiyasiga oid dalillarni qasddan yo‘q qilib yuborganini yozgandi.
The Guardian g‘arb maxsus xizmatlarida Xitoy koronavirus haqidagi ma’lumotlarni yashirganligiga oid dalillar yo‘qligini, Avstraliya gazetadagi ma’lumotlar “Besh ko‘z” razvedka alyansidan emas, AQShning o‘zidan kelganini bildirgan.
Amerikaning The Washington Post gazetasi esa koronavirusga chalinish bo‘yicha dastlabki holat haqida yana turli nazariyalar tarqalishining oldini olish maqsadida Xitoy hukumatini birinchi odam kasallanishi to‘g‘risidagi ma’lumotlarni oshkor qilishga chaqirgan.
