Туркия 2020 йил 10 июндан бошлаб 40 та давлат, жумладан, Ўзбекистон билан авиақатновларни қайта тиклайди. Бу ҳақда Туркиянинг NTV телеканали орқали мамлакат транспорт ва инфратузилма вазири Одил Караисмаилўғлу маълум қилган.
Халқаро парвозлар Туркиядан, хусусан, Шимолий Кипр Республикаси, Баҳрайн, Болгария, Қатар ва Грецияга амалга оширилади.
21 майда Turkish Airlines авиакомпанияси 10 июндан бошлаб халқаро рейсларни амалга оширилишини маълум қилганди. Компания самолётлари мамлакатнинг 16 та пунктидан Европанинг 16 та шаҳрига парвозларни амалга оширади.
Шунингдек, Туркияда июнь бошидан ички рейсларни амалга оширишга рухсат берилганди. 1 июндан бошлаб пляжлар ва миллий хиёбонлар очилган, ресторан, кафе, сув ҳавзаси ва спа-салонлар фаолияти тикланган.
21 майда Туркия маданият ва туризм вазири Меҳмет Нури Эрсой ҳукуматнинг Россия билан авиақатновларни июль ўрталарида қайта тиклаш мумкинлиги ҳақида гапирганди.
Worldometer статистика бюроси берган маълумотларга кўра, Туркияда 4 июнь ҳолати бўйича коронавирус юқтириб олиш бўйича жами 166 минг 422 та ҳолат қайд этилган, 4609 нафар бемор COVID-19’дан вафот этган, 130 минг 852 нафар киши касалликдан тузалган.
Март ойида Истанбул тиббиёт ассоциацияси Туркия Соғлиқни сақлаш вазирлиги берган расмий маълумотлар мамлакатдаги ҳақиқий вазиятга мос эмаслигини билдирган. Ташкилот коронавирус билан касалланганларнинг аксар қисмининг тест натижалари «манфий» деб ёлғон ахборот берилганини маълум қилди. Уларга муолажалар ёзилган, аммо ушбу касалланганлар COVID-19 бўйича расмий статистикага киритилмаган.
Мавзуга доир: Туркия Ўзбекистон ва яна 30 давлатдан бўлган тиббиёт туристлари учун ўз чегараларини очади
«1 июндан бошлаб ички туризм ривожланишига эътибор бердик. Шу билан бирга, ташқи туризмга ҳам. Қаер бизни қабул қилишга тайёр бўлса, биз ҳам тайёр бўламиз — дарров самолётларимизни учирамиз. Мана, Туркия билан ҳам гаплашяпмиз, улар ташқи туризмни очгач, биз ҳам очамиз», — деган Шавкат Мирзиёев.
Изоҳ (0)