Таиланд Вазирлар Маҳкамаси коронавирус пандемиясидан жабрланган иқтисодиётни қўллаб-қувватлаш чораси сифатида мамлакатда кўчмас мулк солиғини 2020 йил охиригача 90 фоизга камайтиришга қарор қилди. «РИА Новости»нинг хабар беришича, бу ҳақда ҳукумат сайтида эълон қилинган.
Унда айтилишича, Вазирлар Маҳкамаси 2 июнь куни бўлиб ўтган йиғилишда 2019 йилда жорий қилинган кўчмас мулк (ер ва иморатларга) солиғини 2020 йил давомида 90 фоизга камайтириш тўғрисида қарор қабул қилган.
Бундан ташқари, илгари февралдан май ойигача уч ойга қолдирилган даромад солиғи бўйича ҳужжатлар топшириш муддати яна икки ойга, 2020 йил августига қолдирилган.
Таиланд ҳукумати пандемиядан азият чеккан жисмоний ва юридик шахсларга иқтисодиётни яхшилашга ёрдам беришга қаратилган бир қатор чора-тадбирларни амалга оширмоқда. Ўтган ҳафта парламент қуйи палатаси иқтисодиётни яхшилаш учун фавқулодда бюджет тўғрисидаги учта қонун лойиҳасини маъқуллади ва ушбу мақсадларга жами 58 миллиард доллар ажратди. Сенат ҳам сешанба куни ушбу қонун лойиҳасини маъқуллаган.
Таиланд ҳукумати томонидан маъқулланган биринчи қонун лойиҳасида юридик ва жисмоний шахсларга ёрдам бериш ва иқтисодиётни рағбатлантириш учун 34,9 миллиард доллардан ортиқ миқдордаги қарз маблағларини жалб қилишга рухсат берилди, иккинчисида — кичик ва ўрта корхоналарга паст фоизли кредитлар бериш учун 15,8 миллиард доллардан ортиқ бюджет ажратиш, учинчисида — мамлакат молиявий тизимини барқарорлаштириш ва Таиланднинг иқтисодий хавфсизлигини таъминлаш учун бюджет ажратилди.
Мамлакатда 3 июнь куни коронавирусга чалиниш бўйича атиги 1 та ҳолат қайд этилган. Аксарият касалланиш ҳолатлари каби бу сафар ҳам четдан юқтирилган. Касаллик Саудиа Арабистони орқали келган 23 ёшли талабада аниқланган.
Таиландда биринчи касалланиш ҳолати январь ойида қайд этилган бўлиб, айни пайтда уларнинг умумий сони 3 084 кишига етган. Беморларнинг 2 968 нафари соғайган, 58 нафари вафот этган.
Изоҳ (0)