Сардоба фалокатидан жабрланган 4025 киши Президент томонидан берилган 40 млн сўмни олди, қарийб 68 минг киши ўз уйига қайтди

Сирдарёдаги сув тошқинидан жабрланган оилаларга Ўзбекистон Президенти томонидан моддий ёрдам сифатида берилган 40 миллион сўмлик пул маблағларини 1 июнь ҳолатига кўра 4025 нафар фуқаро қабул қилиб олган ва уларнинг рўйхати тўлиқ шакллантирилган. Келгусида ушбу моддий ёрдам маблағларини олиши кутилаётган 1818 нафар фуқаронинг рўйхати ҳам тузилган. Бу ҳақда Ички ишлар вазирлиги матбуот котиби Шоҳрух Ғиёсов 2 июнь куни бўлиб ўтган брифингда маълум қилди.

Хабар берилишича, Сардоба, Оқолтин ва Мирзаобод туманларидан эвакуация қилинган жами 89 450 нафар фуқаронинг 67 901 нафари яшаш манзилига қайтарилди. Яна 21 549 нафар фуқаро эвакуация қилинган ҳудудларда қолмоқда.

Таъкидланишича, аҳоли эвакуация қилиниши натижасида бўш қолган ҳудудларни тўлиқ муҳофаза қилиш мақсадида 117 та йўналишда 52 нафар ходим ва 33 та автомобиль ёрдамида патруль хизмати, 32 та назорат ўтказиш пунктлари фаолият юритмоқда.

Хатлов тадбири давомида 3663 нафар фуқаронинг паспорти йўқлиги аниқланган ва шундан 1746 нафар фуқаронинг паспорти топилиб, ўз эгаларига қайтарилган. 1917 нафар фуқарога янги биометрик паспорт расмийлаштириб берилган.

Қидирув ишлари натижасида 11 272 бош уй ҳайвони аниқланиб, уларнинг ҳаммаси ўз эгаларига қайтарилган. 6112 бош нобуд бўлган уй ҳайвони дезинфекция қилинган ҳолда махсус ажратилган бешта ҳудудга кўмилган.

Зарар етган ҳудудларни ободонлаштириш, хавфсиз ҳудудга айлантириш ва фуқароларни доимий яшаш жойларига кўчириш ишларига ички ишлар органларининг 495 нафар ходими сафарбар қилинган.