Uzbekistan Airways компаниясининг чартер юк рейси Фарғонадан тўғридан-тўғри Жанубий Кореянинг Инчхон шаҳрига 50 тоннадан ортиқ гилоснинг навбатдаги партиясини етказиб берди. Ўзбекистоннинг Сеулдаги элчихонаси эса коронавирус инфекциясига қарши кураш, COVID-19 тарқалишининг олдини олиш бўйича халқаро ҳамкорлик доирасида 97 минг 240 доллар миқдоридаги инсонпарварлик ёрдами Тошкентга етиб келишини маълум қилган, деб ёзмоқда «Дунё» ахборот агентлиги.
Фарғона вилоятида етиштирилган гилос Uz-Segang қўшма корхонаси томонидан Жанубий Кореянинг ҳамкор Sunfinite Co., Ltd. компаниясига етказилган. Ўзбек гилослари ўша ердан бутун Жанубий Корея бўйлаб мамлакат улгуржи ва чакана савдо тармоқлари орқали тарқатилади.
Сеулдан Тошкентга олиб келинаётган гуманитар ёрдам рўйхатидан замонавий шприцли насослар, 15 минг қадоқда антисептик воситалар, 12 дона тиббий каравот ва автоматик механизмга эга бўлган кўп функцияли кўрпалар жой олган.
Жиҳозлар Жанубий Кореянинг BOMI Engineering &Construction, Infinity Co., Ltd. компаниялари, Шинхан ва Аджу университетлари ҳамда Хвасонг шаҳар Савдо-саноат палатаси томонидан тақдим этилган.
Инсонпарварлик ёрдами Uzbekistan Airways’нинг чартер юк рейси орқали жўнатилган.
Агентликнинг қайд этишича, яқин кунлар ичида, тахминан, 66 минг доллар миқдоридаги яна бир гуманитар ёрдам чартер юк рейси ташкил этилгандан сўнг Ўзбекистонга юборилиши кўзда тутилган.
Изоҳ (0)