Ўзбекистон Қурилиш вазирлиги ахборот хизмати раҳбари Жамолиддин Қаландаров 2 июнь, сешанба куни бўлиб ўтган брифингда Сардоба сув омбори тўғони ўпирилиши натижасида юзага келган тошқин оқибатлари ва уларни бартараф этиш бўйича амалга оширилаётган ишлар юзасидан ахборот берди.
Маълум қилинишича, ўрганишлар натижасида 4435 та хонадон талафот кўргани аниқланган. Улардан 2390 таси яроқсиз ҳолга келган, 2045 таси эса таъмирталаб ҳолатда.
Аввалроқ «Юксалиш» умуммиллий ҳаракати сув тошқинидан Сардоба, Мирзаобод ва Оқолтин туманларидаги 10 та МФЙда (25 та аҳоли пункти) дастлабки маълумотларга кўра, 4351 та хонадон зарар кўргани, хонадонлардан 2570 таси яроқсиз ва 1781 тасига қисман зарар етгани ҳақида маълум қилганди.
Қурилиш вазирлигининг маълум қилишича, уйларни таъмирлаш учун 4,6 миллиард сўм, ободонлаштириш ишларига 3,8 миллиард сўм сарфланади. Бироқ «Юксалиш» умуммиллий ҳаракати 1773 та уйни таъмирлаш учун 123 миллиард сўм йўналтирилишини маълум қилганди.
Вазирлик ахборотига кўра, пудратчи корхоналар томонидан 13 765 нафар ишчи ва 722 та махсус транспорт воситаси жалб қилинган.
Тезкор маълумотларга кўра, уй-жойларни таъмирлаш учун 4,8 минг тонна цемент, 600 квадрат метр қурилиш ойнаси, 1,5 минг тонна оҳак, 5,2 минг куб метр тахта, 32,3 тонна лок-бўёқ, 167,2 мингта шлакаблок, 13,7 минг куб метр қум, 15,1 минг куб метр шебень, 213,2 минг квадрат метр профнастил, 16,7 тонна мих, 119,2 тонна арматура ва бошқа зарур қурилиш материаллари олиб келинган.
Шунингдек, Сардоба туманида 37 та 1480 хонадонли; Мирзаобод туманида 20 та 800 хонадонли, Мирзаобод туманида 9 та 360 хонадонли кўп қаватли турар жой қурилиш ишлари бошланган.
Изоҳ (0)