Sirdaryodagi suv toshqinidan jabrlangan oilalarga O‘zbekiston Prezidenti tomonidan moddiy yordam sifatida berilgan 40 million so‘mlik pul mablag‘larini 1-iyun holatiga ko‘ra 4025 nafar fuqaro qabul qilib olgan va ularning ro‘yxati to‘liq shakllantirilgan. Kelgusida ushbu moddiy yordam mablag‘larini olishi kutilayotgan 1818 nafar fuqaroning ro‘yxati ham tuzilgan. Bu haqda Ichki ishlar vazirligi matbuot kotibi Shohrux G‘iyosov 2-iyun kuni bo‘lib o‘tgan brifingda ma’lum qildi.
Xabar berilishicha, Sardoba, Oqoltin va Mirzaobod tumanlaridan evakuatsiya qilingan jami 89 450 nafar fuqaroning 67 901 nafari yashash manziliga qaytarildi. Yana 21 549 nafar fuqaro evakuatsiya qilingan hududlarda qolmoqda.
Ta’kidlanishicha, aholi evakuatsiya qilinishi natijasida bo‘sh qolgan hududlarni to‘liq muhofaza qilish maqsadida 117 ta yo‘nalishda 52 nafar xodim va 33 ta avtomobil yordamida patrul xizmati, 32 ta nazorat o‘tkazish punktlari faoliyat yuritmoqda.
Xatlov tadbiri davomida 3663 nafar fuqaroning pasporti yo‘qligi aniqlangan va shundan 1746 nafar fuqaroning pasporti topilib, o‘z egalariga qaytarilgan. 1917 nafar fuqaroga yangi biometrik pasport rasmiylashtirib berilgan.
Qidiruv ishlari natijasida 11 272 bosh uy hayvoni aniqlanib, ularning hammasi o‘z egalariga qaytarilgan. 6112 bosh nobud bo‘lgan uy hayvoni dezinfeksiya qilingan holda maxsus ajratilgan beshta hududga ko‘milgan.Zarar yetgan hududlarni obodonlashtirish, xavfsiz hududga aylantirish va fuqarolarni doimiy yashash joylariga ko‘chirish ishlariga ichki ishlar organlarining 495 nafar xodimi safarbar qilingan.
Izoh (0)