Қорақалпоғистон Республикаси Беруний туманидаги ёқилғи қуйиш шохобчасида 2 июнь, сешанба куни ёнғин содир бўлгани ҳақида хабар берилган эди. Беруний тумани ҳокимлиги ахборот хизмати мазкур ёнғин бўйича маълумот берди.
Маълум қилинишича, Қорақалпоғистон Республикаси Беруний туманида 2 июнь куни соат 11:37 да «Икром Азизбек Акром» хусусий корхонасига қарашли кўп тармоқли автомобилларга ёқилғи қуйиш шохобчасида ёнғин келиб чиққан.
Ёнғинни бартараф қилиш учун ёнғин ўчириш техникалари ва Фавқулодда вазиятлар бўлимининг махсус техникалари етиб келган. Ёнғинни ўчириш учун 10 та ўт ўчириш машинаси жалб қилинган.
Ёнғин соат 13:40 да қамраб олинган ва соат 14:10 да бутунлай бартараф этилган. Ёнғин натижасида жабрланганлар йўқ. Ҳеч кимга зиён етмаган. Ҳозирда барча тозалаш ишлари олиб борилмоқда.
Ёнғин оқибатида шохобчадаги тўққизта идишнинг устки қисми ёниб зарарланган. Уларнинг ёнида жойлашган пропан идишларига олов ўтмаган. Шохобчага қарашли «ГАЗ 53» ва «Зил» русумли бензин ташувчи машиналар тўлиқ ёниб кетган.
Маълум қилинишича, ёнғин келиб чиқишига ёқилғи қуйиш шохобчасида идишларда қолган дизель ёқилғиси ва бензин қолдиқларини бир идишдан бошқасига ўтказиш жараёнида юзага келган техник носозлик сабаб бўлган.
Изоҳ (0)