Ўзбекистон фуқароларини Жанубий Кореяга жўнатиш бўйича фирибгарликка йўл қўйган Korean and Migrations хусусий бандлик агентлигининг мансабдор шахсларига нисбатан қўзғатилган жиноят иши бўйича очиқ суд жараёни бошланди. Бу ҳақда «Дарё»га Олий суд матбуот хизмати раҳбари Азиз Обидов маълум қилди.
Маълум қилинишича, жиноят ишлари бўйича Яккасарой туман судида судланувчилар — хусусий бандлик агентлиги директори Қаҳрамон Отақулов, агентликнинг Наманган вилоят филиали директори Одил Қобилов, агентлик таъсичиси Хушвақт Турдиев, агентликнинг ўқув ишлари бўлими директори Мусурмон Алиқулов, агентликнинг Наманган вилоят филиали иш юритувчиси Анваржон Шамшиддинов, агентликнинг Наманган вилоят филиали ғазначиси Орифжон Жўраев, агентлик ҳисобчиси Мавлуда Отажонова, агентликнинг кадрлар бўлими инспектори Раъно Нуралиева, агентлик ҳамкори Канг Нам Кю ва воситачи Жалол Хидировга нисбатан жиноят ишини кўриб чиқиш бўйича очиқ суд жараёни бошланди. Мазкур жиноят иши судья Т.Қосимов раислигида кўрилмоқда.
«Иш ҳужжатларига кўра, судланувчи Қаҳрамон Отақулов ва бошқалар Ўзбекистон фуқароларини хорижда ишга жойлаштиришда ёлғон ваъдалар бериб, Korean and Migrations хусусий бандлик агентлигига келиб мурожаат қилган фуқароларнинг жуда кўп миқдордаги пул маблағларини қўлга киритиб, ушбу пулларни шахсий эҳтиёжларига сарфлаб юборган», — дейилади Олий суд хабарида.
Қайд этилишича, ушбу жиноят иши бўйича 2372 нафар жабрланувчи ва 4 нафар фуқаровий даъвогар мавжуд. Айблов хулосасига кўра, моддий зарар миқдори 24,2 миллиард сўмни ташкил қилган. Дастлабки тергов мобайнида моддий зарарнинг 13,3 миллиард сўм миқдорини бартараф этиш чораси кўрилган.
Суд жараёни давом этмоқда. Кейинги суд мажлиси 8 июнь кунига тайинланган.
Мазкур жиноят иши бўйича дастлабки тергов ҳаракатлари якунлангани ҳақида 2020 йилнинг март ойида хабар берилган эди.
Бандлик ва меҳнат муносабатлари вазирлигига мазкур агентлик фуқаролар олдидаги мажбуриятларини белгиланган муддатда бажармагани тўғрисида кўплаб норозилик мазмунидаги мурожаатлар келиб тушгани сабабли агентликнинг лицензияси 2019 йилнинг октябрь ойида тўхтатилган. Шундан сўнг Ички ишлар вазирлиги Тергов департаменти томонидан хусусий бандлик агентлигининг мансабдор шахсларига нисбатан жиноят иши қўзғатилгани маълум қилинди.
Хусусий бандлик агентликлари билан боғлиқ вазият ҳақида
Ўзбекистонда хусусий бандлик агентликлари тўғрисидаги қонун 2018 йил октябрь ойида кучга кирган эди. 2019 йил кузидан бери Human, Korean and Migrations ва бошқа хусусий бандлик агентликларининг раҳбарларига нисбатан фирибгарлик моддаси бўйича жиноят ишлари қўзғатилгани ҳақида хабарлар пайдо бўлди (маълумотларга кўра, саккизта агентликка қарши жиноят иши қўзғатилган).Мавзуга доир: Ўзбекистонда яна бир хусусий бандлик агентлиги фуқароларни 2,6 млрд сўмга чув туширгани аниқланди
Ўз навбатида, Бандлик ва меҳнат муносабатлари вазирлиги қонунга ўзбекистонликларни хорижда ишга жойлаштириш бўйича виждонсиз хизмат кўрсатилишидан ҳимоя қила оладиган тузатишларни киритиш ниятини билдирган эди.
17 февраль куни Ўзбекистоннинг турли ҳудудларидан келган 100 га яқин одам Тошкентдаги Мустақиллик майдонида йиғилиб, Human агентлиги томонидан етказилган зарарнинг қоплаб берилишини талаб қилган эди. Улар билан дастлаб бош вазир ўринбосари Азиз Абдуҳакимов ҳамда бандлик ва меҳнат муносабатлари вазири Нозим Ҳусанов учрашди.
Кейинроқ норози фуқаролар билан Ўзбекистон бош вазири Абдулла Арипов ҳам учрашди. Учрашув якунларига кўра, ҳукумат раҳбари Human бандлик агентлиги томонидан фуқароларга етказилган 21 миллиард сўм (тахминан, 2,2 миллион доллар) миқдоридаги зарарни вазирлик ҳузуридаги бюджетдан ташқари фонд ҳисобидан вақтинча қоплаб туриш ҳақида топшириқ берди.
Шу воқеалардан сўнг Ўзбекистонда хусусий бандлик агентликларига хорижга ишга кетаётган фуқаролардан пул ундириш тақиқланишини кўзда тутувчи ҳужжат тайёрланди.
Изоҳ (0)