Қашқадарё вилояти «яшил» ҳудуд бўлишига қарамасдан вилоятдаги мавжуд бозорларнинг еттитаси карантин талабларига жавоб бермаслиги сабаб фаолияти тўхтатилди. Бу ҳақда «Дарё»га вилоят ҳокимлиги ахборот хизмати маълум қилди.
Таъкидланишича, вилоят ҳокими Зоир Мирзаев кеча, 1 июнь куни «Бир ҳудудда бир кун» лойиҳаси доирасида Ғузор туманига борган ва тумандаги «Карвон» бозорининг карантин қоидаларига амал қилмай ишлаётганига гувоҳ бўлган.
«Бу бозор вирус учун тайёр ўчоқ-ку. Бозорнинг тўққизта кириш жойи бор, қани санитария, профилактик тадбирлари йўқ. Бозор тезкор дезинфекция ишларини амалга ошириш учун карантинга ёпилади», — деган вилоят ҳокими бозор фаолияти билан танишар экан.
Ҳокимликнинг қўшимча қилишича, Ғузордаги «Карвон» бозори карантинга ёпилган бозорларнинг еттинчиси бўлади. Бундан аввал Шаҳрисабз шаҳридаги «Янги Кеш», «Чорсу», Қарши шаҳридаги «Нақшаб» ҳамда «Осиё», Деҳқонобод туманидаги «Бойқўрғон беклиги» ва Қарши туманидаги Бешкент деҳқон бозори ҳам вилоят ҳокими танқидига учраб, карантинга ёпилган.
Эслатиб ўтамиз, вилоятда айни кунда 81 та бозор ва савдо комплекслари фаолият кўрсатади. Шундан 60 таси деҳқон, озиқ-овқат бозорлари ҳисобланади.
Изоҳ (0)