Сирдарё вилоятига сафарбар этилган ҳарбий хизматчилар доимий хизматни ўташ жойларига қайтди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.
2020 йилнинг 1 май куни эрталаб Сирдарё вилоятидаги Сардоба сув омбори тўғони ўпирилиши оқибатида техноген тусдаги фавқулодда вазият юз бериб, вилоятнинг Сардоба, Оқ олтин ва Мирзаобод туманларида аҳоли яшаш манзиллари ва ҳудудлар сув ва кўчки остида қолди. Бинолар, йўллар, коммуникация тармоқлари вайрон бўлди, аҳоли вақтинча бошқа ҳудудларга эвакуация қилинди.
«Тошқин оқибатларини бартараф этишга кўмаклашиш мақсадида Мудофаа вазирлигининг барча ҳарбий округларидан ҳарбий хизматчилар Сирдарё вилоятига сафарбар этилган эди. Ўтган муддат давомида ҳарбий хизматчилар қўйилган устувор вазифани адо этиб, аҳоли яшаш манзиллари, ҳудудлар, инфратузилма ва ижтимоий объектлар, йўллар ва телекоммуникация тармоқларида тозалаш, тиклаш ва бунёдкорлик ишларида фидойилик кўрсатишди», — дейилади хабарда.
Таъкидланишича, 1 июнь куни ҳарбий хизматчилар буйруққа асосан ўзларининг доимий хизматни ўташ жойларига қайтган. Мудофаа вазирлиги ҳарбий автомобиль назорати инспекцияси ва Ички ишлар вазирлиги йўл ҳаракати хавфсизлиги бош бошқармаси ходимлари томонидан колонналарнинг йўлларда хавфсиз ҳаракатланиши таъминланган. Шарқий ҳарбий округ қўшинлари эса Гулистон—Марғилон йўналишида темир йўл платформалари орқали манзилга етиб борган.
Мудофаа вазирлиги ахборот ва оммавий коммуникациялар департаменти бошлиғи полковник Баҳром Зулфиқоров Сардоба сув омбори билан юз берган фалокат тафсилотлари ҳақида маълум қилади:
- 750 та хонадонни тозалаш, чиқиндиларни олиб ташлаш ва янги қурилиш молларини ташиш ишлари амалга оширилди;
- 6 та аҳоли пунктида 1405 нафар ҳарбий қурилиш ҳудудида қурилиш чиқиндиларини олиб чиқишда иштирок этди;
- Махсус алоқа бўлими томонидан 1,5 км, 20 та устун алоқа кабели демонтаж қилинди. Талафот кўрган 40 та алоқа мобил базаси тикланди;
- 4 та ҳудуддаги 156 нафар мавсум бошидан буён 4603 нафар фуқарога тиббий ёрдам кўрсатилди.
- Ҳарбий тиббий ходимлар томонидан 200 га яқин аҳолидан таҳлиллар олинди;
- Ҳарбий топографлар томонидан талафот кўрган ҳудудларнинг 1000 тадан ортиқ аэро ва космик суратлари тайёрланди.
Изоҳ (0)