БААнинг Абу-Даби амирлиги расмийлари аҳоли учун асосий шаҳарлар оралиғида ҳаракатланишига бир ҳафталик тақиқ жорий этди. Бу ҳақда 31 май куни Al Arabiya телеканали маълум қилди.
Унда айтилишича, сешанбадан бошлаб аҳолига амирликнинг йирик шаҳарлари Абу-Даби, Ал-Айн ва Аз-Зафра оралиғида ҳаракатланиш тақиқланади. Бундан ташқари, кўрсатиб ўтилган даврда амирлик пойтахти Аб-Дабидан чиқишга ҳам рухсат этилмайди.
Бундай қарор Абу-Даби билан чегарадош амирликларда коронавирус билан боғлиқ чекловларнинг жиддий қисқартирилиши шароитида қабул қилинмоқда. Хусусан, Дубай амирлиги ҳукумати 31 майдан бошлаб давлат идоралари ходимларининг ярмига иш жойларига қайтишга рухсат беришга қарор қилди, 14 июндан бошлаб давлат хизматларининг барча ходимлари ўз иш жойларига қайтиши мумкин.
Май ойининг ўрталаридан бошлаб Дубайда меҳмонхоналар қошидаги пляжлар очилган, аҳолига кичик гуруҳ бўлиб шаҳарда сайр қилиш ва спорт билан шуғулланишга рухсат берилди. 27 майдан Дубайда кинотеатрлар ва спорт марказлари иши тикланган, шунингдек, эҳтиёт чоралари кўрилган ҳолда бошқа бизнес турларига ҳам соат 6:00 дан 23:00 гача фаолият кўрсатишга рухсат берилган.
БАА Соғлиқни сақлаш ва профилактика қилиш вазирлигининг сўнгги маълумотларига кўра, мамлакатда коронавирус юқтирганлик билан боғлиқ 31 мингдан ортиқ ҳолат қайд этилган, беморларнинг 18 мингдан ортиғи тузалган, 264 нафари вафот этган.
Изоҳ (0)