Бухорода Telegram ижтимоий тармоғида ногиронлиги бор фуқаро номига гуруҳ ташкил қилиб, унинг даволаниши учун йиғилган эҳсон пулларини ўзлаштирган фирибгарга жиноят иши қўзғатилди. Бу ҳақда «Дарё»га Бухоро вилоят ИИБ ахборот хизмати хабар берди.
Таъкидланишича, Бухоро туманида яшовчи 24 ёшли аёл М.Р. жорий йилнинг март ойида ижтимоий тармоқлар орқали Бухоро шаҳрида яшовчи 43 ёшли ногиронлиги бор фуқаро Н.М. билан танишган. Н.М.нинг буйрак хуружи хасталиги билан касалланганини эшитган фуқаро у билан янада яқинроқ бўлишга ҳаракат қилган. Унга таниш-билишлари кўплиги, улар орқали ўзи ташкил қилган хайрия эҳсон ҳисоб-рақамига пуллар тушириб, даволатишга кўмаклашишини ваъда қилган.
Аёл ногиронлиги бор фуқаронинг касаллик тарихи тўғрисидаги ҳужжатлардан кўчирмалар олиб, Telegram’да унинг номидан гуруҳ ташкил қилган. Шундан сўнг беморнинг даволаниши учун ўтказилган эҳсон пулларини ўз номидаги пластик картага туширган. Ва эҳсон учун йиғилган жами 8 миллион 455 минг сўм пулни ўз эҳтиёжларига сарфлаб юборган.
«Ҳуқуқ-тартибот идораси ходимлари фуқаро М.Р.нинг фирибгарлик жиноятини фош этгач, ҳолат юзасидан унга нисбатан Жиноят кодексининг 168-моддаси 1-қисми (Алдаш ёки ишончни суиистеъмол қилиш йўли билан ўзганинг мулкини ёки ўзганинг мулкига бўлган ҳуқуқни қўлга киритиш) билан жиноят иши қўзғатилган. Ва тергов суриштирув ишлари олиб борилмоқда», — дейди вилоят ИИБ ахборот хизмати раҳбари Қувват Ярашов.
Изоҳ (0)