Тошкентда 47 нафар, Самарқандда 7 нафар бемор коронавирусдан тузалди. Ўзбекистонда COVID-19’дан соғайганлар сони 2837 нафарга етди
Тошкент шаҳрида Вирусология илмий-текшириш институти клиникасида 33 нафар, Эпидемиология, микробиология ва юқумли касалликлар илмий текшириш институти клиникасида 14 нафар, шунингдек, Самарқанд вилояти юқумли касалликлар шифохонасида 7 нафар, жами 54 нафар бемор COVID-19 коронавирус инфекциясидан тузалди ва реабилитацияга кузатилди. Бу ҳақда Соғлиқни сақлаш вазирлиги хабар қилган.
Хабарга кўра, Вирусология илмий-текшириш институти клиникасида тузалганларнинг 23 нафари эркаклар, 10 нафари аёллар, беморларнинг энг каттаси 68 ёшда, кичиги эса 2 ёшда. Ҳудудлар кесимида олинганда Тошкент ва Хоразм вилоятларида 5 нафардан, Самарқанд вилоятида 4 нафар, Фарғона вилоятида 3 нафар, Қорақалпоғистон Республикаси, Сирдарё, Жиззах, Бухоро, Сурхондарё вилоятлари ва Тошкент шаҳрида 2 нафардан, Андижон, Қашқадарё, Наманган вилоятлари ҳамда Қозоғистон Республикасида мос равишда 1 нафардан бемор касалликдан тузалган.
Эпидемиология, микробиология ва юқумли касалликлар илмий-текшириш институти клиникасида тузалганларнинг 8 нафари эркак, 6 нафари аёл: ёши каттаси 57 да, энг кичиги 11 ёшда. Клиникада тузалганлар Тошкент ва Фарғона вилояти ҳамда Тошкент шаҳридан 2 нафардан, Қорақалпоғистон Республикаси, Сурхондарё, Қашқадарё, Самарқанд, Сирдарё, Андижон, Наманган ва Хоразм вилоятларида мос равишда бир нафардан.
Тошкент шаҳрида шу пайтга қадар 1063 нафар бемор соғайган бўлса, эндиликда уларнинг сони 1110 нафарга етди.
Самарқандда тузалганларнинг 2 нафари Тойлоқ туманида яшайди, қолганлар эса мос равишда Пастдарғом, Ургут, Оқдарё, Пайариқ туманлари ва Самарқанд шаҳрида истиқомат қилади. Соғайганларнинг 4 нафари эркаклар, 3 нафари аёллар, ёши каттаси 72 да, энг кичиги эса 5 ёшда.
Самарқанд вилоятида ҳозирга қадар соғайганлар 274 нафар бўлса, эндиликда уларнинг сони 281 нафарга етган.
Ўзбекистонда 31 май соат 16:45 ҳолатига кўра, ортда қолган бир сутка давомида жами 54 нафар бемор COVID-19’дан тузалган ва соғайганларнинг умумий сони 2837 нафарни ташкил қилмоқда.
Ўзбекистонда 31 май соат 17:00 ҳолатига кўра, COVID-19’ни юқтириб олганларнинг умумий сони 3583 нафарга етган, 14 нафар бемор эса коронавирус инфекцияси асоратлари оқибатида вафот этган.
Аввал Тошкентда коронавирусга чалинган уч бемор реанимацияга олингани хабар қилинганди.
