Хитойда сўнгги бир суткада коронавирус билан касалланиш бўйича 2 та ҳамда касаллик белгисиз ўтаётган 23 та ҳолат қайд этилди. Беморлардан ҳеч бири вафот этмади, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Янги касалланиш ҳолатларининг ҳар иккиси четдан юқтирилган бўлиб, Шанхайда қайд этилган.
Эпидемия бошланганидан буён Хитойда 82 995 киши коронавирусга чалинган. Беморларнинг 78 288 нафари соғайган, 4634 нафари вафот этган. Касалхоналарда 73 нафар бемор даволанмоқда.
Шунингдек, сутка давомида 23 киши инфекцияни белгиларсиз ташувчи сифатида қайд этилган. Шундай кишиларнинг яна 413 нафари шифокорлар назоратида бўлиб турибди.
Жанубий Кореяда эса сутка давомида 79 киши коронавирусга чалингани қайд этилди. Касалланганларнинг умумий сони 11 344 нафарга етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб.
Бундан бир кун аввал касалланишлар сони ортиб, 40 кишида коронавирус аниқланганди. Эпидемия бошланганидан буён кунлик касалланишлар сони 80-90 тадан 10-20 тагача камайган, 6 май куни эса бу кўрсаткич 2 кишигача тушганди.
Сеулнинг одам гавжум бўлган Итхэвон ҳудудидаги клуб ва барларда касаллик юқтирганлар сони камида 259 нафарни ташкил қилмоқда.
Вирусни оммавий юқтириш билан боғлиқ бошқа ҳолатлар ҳам аниқланган. Хусусан, коронавирусга чалинишнинг олдини олиш бўйича чораларга етарлича амал қилмаган Пучон шаҳридаги Coupang компанияси омборхонасида камида 69 киши вирусни юқтириб олган. Айни пайтда омборхонанинг ходимлари ва унга ташриф буюрган жами 4159 киши карантинга олинган. Жума куни уларнинг коронавирусга тест натижалари чиқиши лозим. Шу сабабли қайд этилган касалланишлар сони яна ортиши кутилмоқда.
Изоҳ (0)