Дональд Трамп Хитойнинг Гонконгга нисбатан ҳаракатларига жавобан АҚШ «кучли» қарши чоралар ишлаб чиқаётганини маълум қилди. Бу ҳақда Reuters хабар бермоқда.
«Биз ҳозир бир нарса қиляпмиз. Ўйлайманки, бу сизга жуда қизиқ туюлади. Бу ҳақда бир неча кундан кейин айтаман», — деган Трамп брифингда. Янги санкциялар бўладими деган саволга жавобан Трамп Хитойга жавоб чоралари кутилгандан кўра кучлироқ бўлишини билдирган.
Бундан аввалроқ Оқ уй матбуот котиби Кейли Макинани Дональд Трамп Хитойнинг Гонконг автономиясини чеклаш ҳаракатларидан норози эканлигини ва бу ҳолатда «эркин шаҳар» халқаро молиявий марказ мақомини сақлаб қололмаслигини билдирган.
Трампнинг иқтисодий маслаҳатчиси Ларри Кудлоу эса «Хитой катта хатога йўл қўймоқда», деб айтган.
Хитой ҳукумати Гонконгда миллий хавфсизлик тўғрисидаги янги қонунни ишлаб чиқиш масаласини кўрмоқда. Ушбу қонун ёрдамида ҳукумат Гонконг устидан назоратни кучайтириши мумкин. Қонунда сепаратистик фаолиятни қатъиян тақиқлаш ва Хитойнинг марказий ҳукуматига мунтазам равишда ҳисобот бериш талаби мавжуд.
Маълумот учун, Гонконг Хитой таркибига 1997 йилда қайтган. Унгача Буюк Британия томонидан бошқарилган. Хитой ва Гонконгнинг қўшма декларациясига биноан, шаҳарга 50 йил давомида кенг автономия ваъда қилинган. Ушбу мақом туфайли Гонконг АҚШ билан эркин алоқалар ўрнатган. Буюк Британия Хитойни Гонконг автономиясини ҳурмат қилишга чақирди.
Ушбу қонунга қарши гонконгликлар намойишга чиққан. Унда иштирок этган юзлаб одамлар қўлга олинган.
Изоҳ (0)