Москва мэри Сергей Собянин шаҳарда карантин юмшатилишини эълон қилди, деб хабар бермоқда Meduza. Бу ҳақда у Владимир Путин билан видеоконференция шаклида бўлиб ўтган учрашувда маълум қилган.
Сергей Собянин 1 июндан бошлаб ташриф буюрувчилар билан узоқ муддатли мулоқотни талаб қилмайдиган ноозиқ-овқат дўконлари, шунингдек, маиший хизмат кўрсатиш корхоналари фаолиятини қайта тиклашни таклиф қилди.
Шунингдек, фуқароларга кўчада сайр қилиб юришга синов тариқасида рухсат бериш режалаштирилаётганини маълум қилган. Бунда кўчада бирданига одамлар кўпайиб, «бозор» бўлиб кетмаслиги учун у муайян жадвалга мувофиқ амалга оширилади. Бундан ташқари, 1 июндан бошлаб касалхоналар режали тиббий ёрдам кўрсатишга аста-секин ўта бошлайди.
Собянин шаҳарда 12 майдан бошлаб мингдан ортиқ қурилиш объектларидаги ишлар, шунингдек, саноат корхоналари тикланганини, бир вақтнинг ўзида транспортда қўлқоп-ниқоб режими жорий этилганини таъкидлаб ўтган.
Москва мэрининг билдиришича, ўтган икки ҳафтда коронавирусга чалиниш ва касалхонага ётқизиш ҳолатлари сони камайди. Вазият барқарорлашди ва яхшиланди, бу эса чекловларни янада юмшатиш имконини беради.
Аввалроқ Сергей Собянин турли аҳоли гуруҳларининг скрининг тадқиқотлари асосида Москва аҳолисининг 2 фоизи коронавирусга чалинганини маълум қилганди. Унинг айтишича, бу пандемия тарқалган дунё шаҳарлари орасида энг паст кўрсаткичдир.
Изоҳ (0)