Ўзбекистон Президенти Шавкат Мирзиёев аҳоли орасида коронавирусга чалиниш ҳолатларининг ортиб кетишини жойларда назоратнинг сусайгани билан боғлади. Бу ҳақда Президент 26 май куни ўтказилган йиғилишда маълум қилган.
Фото: Президент матбуот хизмати
«Кейинги кунларда респбуликамизда коронавирус билан касаллаганлар сони кўпайганини ҳаммамиз кўриб турибмиз. Иқтисодиётимизни тиклаш нуқтаи назаридан, биз карантинни юмшатдик, лекин кўп фуқароларимиз, жойлардаги мутасадди ташкилотлар касаллик тугади деб қабул қилишяпти. Ўзбекистон ҳудудида ҳали карантин тугамаган», — дейди мамлакат раҳбари.
Бугунги кунда Ўзбекистондаги 40 та туман ва шаҳар «қизил» зоналигича қолмоқда, «сариқ» ҳудудлар эса 45 тани ташкил этмоқда. Сўнгги 10 кун ичида аҳоли орасида инфекцияга чалиниш ҳолатларида ўсиш кузатилди. Хусусан, Навоийда 57 кишида, Самарқандда 73 кишида, Тошкент шаҳри ва Тошкент вилоятида 114 кишида коронавирус аниқланган.
«Булар хориждан келганлар эмас. Бу ҳокимлар ва мутассади ташкилот раҳбарлари ‘жиловни қўйиб юборгани’ сабаб юзага келмоқда», — дея қайд этади Президент.
Шавкат Мирзиёенинг сўзларига кўра, айниқса, бозорлар, савдо комплекслари ва банкларда ижтимоий масофаланишга амал қилмаслик, кўча-кўйда тиббий ниқоб тақмасдан юриш, уйларда турли тадбирлар ўтказиш ҳолатлари аниқланмоқда.
«Агарда биз карантин чораларига эътибор қаратмайдиган бўлсак, бу одамларимизга, айниқса, қариялар, ота-оналаримизга салбий таъсир кўрсатади. Энг қўрқинчли томони, касаллик Тошкентдаги бозорлар, дорихоналар, банкларда аниқланмоқда. Бу нимадан далолат беради? Яна бир бор айтаман: касаллик тугади деб, ҳамма нарсани ташлаб қўяяпмиз», — дейди Шавкат Мирзиёев.
Давлат раҳбари бундай вазият Ўзбекистонда COVID-19’ни аниқлаш, унинг олдини олиш ва даволаш бўйича олиб борилаётган барча саъй-ҳаракатларни йўққа чиқариши мумкинлигини таъкидлади.
«Ҳар бир корхона раҳбарига, шаҳар, туман, вилоят ҳокимига битта нарсани билдирмоқчиман: қайси ҳудуд шу масалаларга қаттиққўллик билан эътибор бермаса, эртага туманни, шаҳарни, вилоятни ҳам ёпиб қўйишга мажбур бўламиз», — дейди Шавкат Мирзиёев.
Аввалроқ Президент «қизил» ва «сариқ» ҳудудларда кунлик тест олиш сонини ошириш ҳақида кўрсатма берганди.
Эслатиб ўтамиз, Ўзбекистон ҳудудлари эпидемиологик вазиятдан келиб чиқиб 8 майдан эътиборан, «яшил», «сариқ» ва «қизил» тоифаларга ажратиб чиқилган эди. 15 майдан барча тоифалардаги ҳудудларда айрим карантин чекловлари янада юмшатилган.
18 майдан «сариқ» тоифадаги ҳудудларда шахсий автотранспорт воситаларини стикерсиз соат 06:00 дан 22:00 гача бошқаришга, «яшил» ҳудудларда эса умуман чекловсиз фойдаланишга рухсат берилган эди.
