Тошкент вилояти Бўка тумани ҳоким ўринбосари халқ таълими муассасалари фаолиятига асоссиз аралашгани, педагог кадрларнинг шаъни ва қадр-қимматини камситиб, уларни касбий фаолияти билан боғлиқ бўлмаган ишларга жалб қилгани учун 22,3 миллион сўм жаримага тортилди. Бу ҳақда Халқ таълими вазирлиги хабар берди.
Маълумотларга кўра, Бўка тумани ҳокимининг ўринбосари Анвар Хонтўраев томонидан туманда жойлашган таълим муассасалари раҳбарларига ободонлаштириш ҳамда томорқа ишлари бўйича хатлов ўтказиш каби топшириқлар берилган.
Хусусан, Хонтўраев 19 апрель куни Вазирлар Маҳкамасининг 2020 йил 23 мартдаги 176-сонли қарорига зид равишда тумандаги 12-сонли умумтаълим мактабида 53 нафар таълим муассасаси раҳбари ва маҳалла фаолларига йиғилиш ўтказган. Унда 12-мактаб директори М.Ҳакимованинг ўз вақтида томорқа бўйича аҳолини хатлов қилмаганлиги учун унинг касбий фаолиятига асоссиз аралашиб, унга тазйиқ ўтказган.
Шунингдек, у мактаб директоридан туман ҳокими номига тушунтириш хати ва 20 апрель кунидан ишдан бўшаш тўғрисида аризасини олган.
Бундан ташқари, 6—7 май кунлари Хонтўраев туманда фаолият юритаётган 15, 16, 18, 24, 50-умумтаълим мактаблари директорларига тазйиқ ўтказиб, туман марказидаги «Ёшлар майдони»га директорлар ва хўжалик ишлари бўйича ўринбосарларини, яъни 25 кишини майдонда ўсган ўтларни ўриш каби мажбурий меҳнатга жалб қилган.
Аввалроқ Самарқанд вилоятининг Нарпай тумани ҳокими рўзадор ўқитувчиларни ҳожатхона тозалашга жалб қилгани ҳақида хабар берилганди.
Изоҳ (0)