Тошкентнинг Мирзо Улуғбек туманидаги электр тармоқлари корхонасида 28 май куни электр тармоғидан узиб қўйилган истеъмолчиларнинг катта навбати юзага келди. Ушбу вазиятга Telegram’даги @davletovuz канали эътибор қаратган.
Канал ўқувчисининг маълум қилишича, бу бинонинг ташқарисидаги ҳолат, ичкарида аҳвол бундан ҳам ёмон; уларнинг кўпчилиги карантин туфайли даромадини йўқотган, пули йўқ, қарзга ёқиб беринглар, деб илтимос қилмоқда.
«Давлат бир беморга ўртача 32 миллион сўм сарфлаяпти. Шу одамларнинг умумий қарзи 32 миллион чиқмаса керак... ‘Ҳудудий электр тармоқлари’ АЖ карантин даврида қарздор истеъмолчилар (жисмоний шахслар) электр энергиясидан вақтична узилмайди, деган эди бир пайтлар», — деб ёзган @davletovuz.
Сўнгги бир неча кундан бери Ўзбекистоннинг турли нуқталарида карантин талабларининг қўпол равишда бузилиши ҳолатлари қайд этилмоқда, бироқ бундай ҳолатлар бўйича тегишли чоралар кўрилгани маълум эмас; айни вақтда расмийлар томонидан карантин талаблари бузилиб, касалланиш ҳолатлари кўпаядиган бўлса, карантин янада қатъийлаштирилиши таъкидланмоқда.
Эслатиб ўтамиз, 28 май соат 10:00 ҳолатига кўра Ўзбекистонда коронавирусга чалинганлар сони 3396 нафарга етган (уларнинг 2668 нафари соғайган, 14 нафари вафот этган, 714 нафари даволанишни давом эттирмоқда). Сўнгги кунларда, жумладан, Тошкент шаҳрида ҳам аҳоли орасида касалланиш ҳолатлари сони кўпайиб бормоқда — биргина 28 май тонгида пойтахтда аҳоли орасида етти кишида коронавирус аниқланган.
Изоҳ (0)