Санкт-Петербург давлат темир йўллари университетида таҳсил олаётган ўзбекистонлик талабалар коронавирус инфекциясини юқтириб олишгани ҳақидаги маълумотни сир тутгани маълум бўлди. Бу ҳақда университет матбуот хизмати хабар берди.
«Кўрсатилган талаблар ва тавсияларга риоя қилмаслик натижасида 7а ётоқхонада яшовчи Ўзбекистондан бўлган бир қатор аспирантлар ва талабалар касалликни юқтириб олишган. Коронавирусга тестни мустақил равишда топшириб, улар университет маъмурияти, ётоқхона раҳбарини бу ҳақда хабардор қилмаган, натижада ётоқхонада яшовчи бошқа талабалардан кейин, охирги бўлиб изоляцияга жойлаштирилган», — дейилади хабарда.
Бундан ташқари, маъмуриятнинг талабалар турар жойида яшаш тартибига риоя қилиш талабларига қарамай, талабалар ўз-ўзини изоляция қилиш шароитида уни бир неча бор бузган.
«Натижада ўзбекистонлик қатор талабалар томонидан санитария-эпидемиология талабларини қўпол равишда бузиш бошқа талабалар ва университет ходимларига хавф туғдирган, бу ҳолат университетнинг тезкор штаб йиғилишида кўриб чиқилди. Тезкор штаб, факультетлар ва халқаро алоқалар бўлими раҳбарияти қарори билан университет ректорига талабаларни ётоқхонада яшаш қоидаларини, университетнинг маҳаллий актларини бузганлиги учун ўқишдан четлатиш масаласини кўриб чиқиш тўғрисида илтимоснома юборилди», — дейилади ОТМ хабарида.
Аввалроқ карантин сабабли Россиядаги 1000 нафардан ортиқ ўзбекистонлик талабага ёрдам кўрсатилгани ҳақида хабар берилганди.
Эслатиб ўтамиз, Россиядаги ўзбекистонликларни ватанга қайтариш учун 25 майдан 7 июнга қадар Екатеринбург, Москва, Санкт-Петербург, Ростов-Дон ва Новосибирск шаҳарларидан яна янги чартер рейслар амалга оширилади.
Изоҳ (0)