Навоий шаҳрининг нисбатан гавжум ва тирбанд нуқталаридан бири ҳисобланган Амир Темур ва Ғалаба кўчалари кесишмасидаги пиёдалар учун ер усти мега-кўприги қурилиши сўнгги босқичга кирди. Бу ҳақда «Ўзбекистон 24» телеканали хабар бермоқда.
Хабар беришларича, пиёдалар учун мўлжалланган ер усти кўприги қурилаётган жой яқинида деҳқон ва буюм бозори, бир қатор ташкилот ва идоралар жойлашган; светофорлар билан тартиба солинган чорраҳадан дақиқасида 400 га яқин пиёда ўтади.
«Навоий кўприклардан фойдаланиш» корхонаси вакили Алберт Каримовнинг сўзларига кўра, ушбу пиёдалар кўприги ЙТҲ хавфини камайтиради ва тирбандликларнинг олдини олишга ёрдам беради. Кўприкда пандуслар ва лифтлар ҳам назарда тутилган.
Таъкидланишича, ҳозиргача режалаштирилган ишларнинг 80 фоизи бажариб бўлинган, қурилиш ишларида 100 га яқин ишчи-ходим меҳнат қилмоқда. «Кўприк Мустақиллик байрами арафасида фойдаланишга топширилиши режалаштирилган», дейилади «Ўзбекистон 24» лавҳасида.
Қўшимча қилишларича, лойиҳа қиймати 15 миллиард сўмдан ортиқ. Қайд этиш жоиз, ушбу кўприк қурилиши 2019 йилнинг апрель ойида бошланган бўлиб, ўшанда унинг қиймати 12 миллиард сўм деб эълон қилинган, шунингдек, у 2019 йил сентябрида фойдаланишга топширилиши айтилганди.
Маълумот ўрнида, Ўзбекистоннинг бошқа шаҳарларида, жумладан, пойтахт Тошкентда ҳам пиёдалар учун бир қатор ер усти кўприклари қурилган, бироқ уларнинг бари ҳаракат светофор билан тартибга солинмаган чорраҳалар ва йўллар узра қад кўтарган.
Изоҳ (0)