Toshkentning Mirzo Ulug‘bek tumanidagi elektr tarmoqlari korxonasida 28-may kuni elektr tarmog‘idan uzib qo‘yilgan iste’molchilarning katta navbati yuzaga keldi. Ushbu vaziyatga Telegram’dagi @davletovuz kanali e’tibor qaratgan.
Kanal o‘quvchisining ma’lum qilishicha, bu binoning tashqarisidagi holat, ichkarida ahvol bundan ham yomon; ularning ko‘pchiligi karantin tufayli daromadini yo‘qotgan, puli yo‘q, qarzga yoqib beringlar, deb iltimos qilmoqda.
“Davlat bir bemorga o‘rtacha 32 million so‘m sarflayapti. Shu odamlarning umumiy qarzi 32 million chiqmasa kerak... ‘Hududiy elektr tarmoqlari’ AJ karantin davrida qarzdor iste’molchilar (jismoniy shaxslar) elektr energiyasidan vaqtichna uzilmaydi, degan edi bir paytlar”, — deb yozgan @davletovuz.
So‘nggi bir necha kundan beri O‘zbekistonning turli nuqtalarida karantin talablarining qo‘pol ravishda buzilishi holatlari qayd etilmoqda, biroq bunday holatlar bo‘yicha tegishli choralar ko‘rilgani ma’lum emas; ayni vaqtda rasmiylar tomonidan karantin talablari buzilib, kasallanish holatlari ko‘payadigan bo‘lsa, karantin yanada qat’iylashtirilishi ta’kidlanmoqda.
Eslatib o‘tamiz, 28-may soat 10:00 holatiga ko‘ra O‘zbekistonda koronavirusga chalinganlar soni 3396 nafarga yetgan (ularning 2668 nafari sog‘aygan, 14 nafari vafot etgan, 714 nafari davolanishni davom ettirmoqda). So‘nggi kunlarda, jumladan, Toshkent shahrida ham aholi orasida kasallanish holatlari soni ko‘payib bormoqda — birgina 28-may tongida poytaxtda aholi orasida yetti kishida koronavirus aniqlangan.
Izoh (0)