26 май кунидан бошлаб Тошкент—Андижон—Тошкент йўналишида 62/61-сонли йўловчи поезди ҳаракати қайта тикланди. Бу ҳақда «Ўзтемир йўлйўловчи» АЖ хабар берди.
Мазкур поезд қатнови Республика махсус комиссияси томонидан тасдиқланган карантин даврида маҳаллий йўналишларда темир йўл қатновларини йўлга қўйишнинг вақтинчалик тартибига риоя қилган ҳолда амалга оширилмоқда.
Таъкидланишича, йўловчилар чипталарни электрон тарзда ҳам харид қилиши мумкин. Поездга чиқишдан олдин йўловчилардан йўл варағини тўлдириш ва вақтинчалик ўрнатилган тартибга ҳамда санитария-гигиена қоидаларига қатъий риоя қилиниши талаб этилади.
Қўшимча маълумотларни Тошкент шаҳридаги 1005 қисқа телефон рақами, жойлардаги темир йўл кассалари ҳамда маълумотлар бюроси орқали билиб олиш мумкин.
Эслатиб ўтамиз, 18 май кунидан Тошкент шаҳридан Нукус, Урганч, Термиз шаҳарларига авиақатновлар ҳамда Тошкент шаҳридан Навоий, Бухоро, Қарши шаҳарларига «Афросиёб» тезюрар поезди ҳамда Фарғона водийсига темир йўл қатнови қайта тикланиши ҳақида хабар берилган эди.
Изоҳ (0)