«‘Саломатлик’ орденини таъсис этиш тўғрисида» ҳамда «‘Соғлом турмуш’ медалини таъсис этиш тўғрисида»ги қонун 26 май куни Президент томонидан имзоланди, деб хабар бермоқда Адлия вазирлиги матбуот хизмати. Қонун билан «Саломатлик» ордени ва «Соғлом турмуш» медали таъсис этилди ҳамда орден ва медал тўғрисидаги тегишли низом тасдиқланди.
«Саломатлик» ордени билан Ўзбекистон фуқаролари мамлакатда соғлиқни сақлаш тизимини ривожлантириш, аҳоли саломатлигини яхшилаш ҳамда ушбу соҳада халқаро ҳамкорликни мустаҳкамлашдаги алоҳида хизматлари учун мукофотланади. Орден билан чет эл фуқаролари ва фуқаролиги бўлмаган шахслар ҳам мукофотланиши мумкин.
«Саломатлик» ордени икки даражадан иборат бўлади.
- I даражали «Саломатлик» ордени билан мукофотланган шахслар БҲМнинг 30 баравари миқдорида, II даражали «Саломатлик» ордени билан мукофотланган шахслар БҲМнинг 25 баравари миқдоридаги бир марталик пул мукофоти олади.
- I ва II даражали «Саломатлик» ордени билан мукофотланган шахслар қонун ҳужжатларида белгиланадиган имтиёзлардан фойдаланади.
«Соғлом турмуш» медали билан аҳоли орасида соғлом турмуш тарзини шакллантиришга қўшган ҳиссаси учун соғлиқни сақлаш муассасалари шифокорлари, ОАВ вакиллари ва блогерлар, фуқаролар, намунали оилалар ва спортчилар ва бошқа шахслар мукофотланади.
Медал билан мукофотланган шахслар БҲМнинг 10 баравари миқдоридаги бир марталик пул мукофоти олади ва қонун ҳужжатларида белгиланадиган имтиёзлардан фойдаланади.
Ушбу қонунлар расмий эълон қилинган кундан эътиборан кучга киради.
Эслатиб ўтамиз, Олий Мажлис Қонунчилик палатасининг 23 март кунги мажлисида депутатлар бир неча қонун лойиҳалари қаторида «III ва IV даражали ‘Соғлом авлод учун’ орденини таъсис этиш тўғрисида»ги, «‘Соғлом авлод учун’ медалини таъсис этиш тўғрисида»ги қонун лойиҳаларини муҳокама қилганди.
«Бу янгилик, айниқса, коронавирус пандемияси бутун дунёга хавф солиб турган бугунгидек кунда ниҳоятда долзарб аҳамиятга эга бўлиб, кечани кеча, кундузни кундуз демай, ўз соғлиғи ва ҳаётини хавфга қўйиб бўлса-да, одамлар саломатлиги учун курашаётган фидойи касб эгаларини маънавий жиҳатдан рағбатлантиришга имкон яратади», — деб таъкидлаганди парламент хабарида.
Айни пайтда Ўзбекистонда коронавирус инфекциясини юқтириб олиш билан боғлиқ 3333 та ҳолат аниқланган. Касалликдан вафот этган беморлар сони 14 кишига етди.
Изоҳ (0)