Андижон вилоятининг Избоскан туманида 25 май куни «Андижон намунаси» асосида «Соғлом ҳаёт учун 5000 қадам» шиори остида пиёда юриш тадбири ташкил этилган, 23 май куни эса шу туманда яшовчи бир кишида коронавирус инфекцияси аниқлангани ҳақида хабар берилган эди. Андижон вилоят ҳокимлиги матбуот хизмати бу масала бўйича муносабат билдирди.
Қайд этилишича, Президентнинг 2020 йил, 21—22 май кунлари Андижон вилоятига ташрифи давомида «Соғлом ҳаёт учун 5 000 қадам» лойиҳасини амалга ошириш юзасидан алоҳида топшириқ ва таклифлар берилган.
Шунга асосан 25 май куни Избоскан туманида ўтказилган акция карантин тартиб-қоидаларига қатъий риоя қилинган ҳолда туман санитария-эпидемиология осойишталик маркази мутахассисларининг махсус назорати остида ташкил этилган.
Акция ўтказиладиган ҳудудда акция бошланишидан олдин зарарсизлантириш гуруҳи томонидан зарарсизлантириш ишлари олиб борилган. Шунингдек, тадбир аввалида барча акция иштирокчилари махсус тиббий кўрикдан ўтказилиб, антисептик воситалари билан дезинфекция қилинган ҳолда иштирок этишга рухсат берилган.
Касаллик 24 май куни туманнинг «Жонобод» МФЙ ҳудудида яшовчи фуқарода аниқлангани, шу куннинг ўзида ушбу ҳудуд тезкорлик билан карантинга олингани таъкидланган.
«‘Жонобод’ МФЙ туман марказидан 6 километр акция ўтказилган ҳудуд (‘Куйганёр’ МФЙ)дан 12 километр узоқликда жойлашган бўлиб, ташкил этилган пиёда юриш акциясида ушбу ҳудуддан ҳеч ким иштирок этмаганлигини маълум қиламиз», — дейилади хабарда.
Соғлиқни сақлаш вазирлиги томонидан 25 май куни берилган маълумотларга кўра, Андижон вилоятида коронавирусга чалиниш бўйича жами 175 та ҳолат қайд этилган. Бу рақам 17 май кунидан буён ўзгаришсиз қолмоқда.
Изоҳ (0)