АКТ вазирининг собиқ ўринбосари Олимжон Умаров бош вазир маслаҳатчиси этиб тайинланди

Олимжон Умаров Ўзбекистон бош вазирининг маслаҳатчиси сифатида иш бошлади, деб хабар беради Ахборот технологиялари ва коммуникацияларини ривожлантириш вазирлиги.

Таъкидланишича, ахборот технологиялари ва коммуникацияларини ривожлантириш вазирининг биринчи ўринбосари Олимжон Умаров Ўзбекистон бош вазирининг маслаҳатчиси — IТ технологиялар, телекоммуникациялар ва инновацион фаолиятни ривожлантириш масалалари департаменти бошлиғи лавозимига тайинланган.

Олимжон Умаров 1985 йилда Тошкент шаҳрида туғилган. Олий маълумотли. 2007 йилда Мирзо Улуғбек номидаги Ўзбекистон Миллий университетини, 2017 йилда Сонгюнгван университетини (Жанубий Корея) тамомлаган.

Олимжон Умаров 2017 йил ёзида АКТ вазирининг биринчи ўринбосари лавозимига тайинланганди.

Эслатиб ўтамиз, Вазирлар Маҳкамасининг янгиланган ижро этувчи тузилмасидаги ушбу лавозим «Ўзбекистон Республикаси Вазирлар Маҳкамасининг фаолиятини такомиллаштиришга оид қўшимча чора-тадбирлар тўғрисида»ги Президент қарорига кўра киритилганди.