Бутун дунёга машҳур Hertz ижара контораси кўп миллиардлик қарзлари ва коронавирус пандемияси оқибатида талабнинг камайиб кетгани сабаб банкротлигини эълон қилди, деб хабар беради Motor.
Молиявий муаммолар талабнинг камайгани боис кескин тушиб кетган даромадлар билан изоҳланган: автомобиллар ижараси билан шуғулланувчи йирик сервис банкротлигини маълум қилди. Hertz’нинг бош компанияси Америка қонунчилигига кўра, Делавэр округининг банкротлик судига қайта ташкил этиш тўғрисида ариза берган. Компаниянинг маълум қилишича, банкротликка коронавирус пандемияси оқибатида ижара автомобиллари хизматига бўлган талабнинг «кутилмаганда ва драматик» равишда тушиб кетиши сабаб бўлган. Натижада бу даромаднинг кескин камайишига ва 17 миллиард доллар миқдоридаги зарарга олиб келган.
Суд Hertz ишини кўриб чиққунига қадар компания мижозларга хизмат кўрсатишни давом эттиради — компанияда ўзининг ҳозирги фаолиятини қўллаб-қувватлашга 1 миллиард доллари қолган.
Илтимоснома Hertz Global Holdings ва унинг АҚШ ҳамда Канададаги бир нечта шўъба корхоналари томонидан киритилган. Банкротлик тўғрисидаги ариза Hertz’нинг Австралия, Европа ва Янги Зеландиядаги сервисларининг фаолиятини ўз ичига олмайди. Компания банкротликдан қочиш мақсадида март ойида ўзига тегишли автомобилларнинг бир қисмини сотиб юборган, майда эса қарийб ярим ходимларини — 20 минг кишини ишдан бўшатганди.
Hertz компаниясига 1918 йилда Чикагода асос солинган ва ҳозирда АҚШда 2 мингга яқин, бутун дунё бўйлаб эса 5 мингдан ортиқ ижара пунктларига эга.
Изоҳ (0)