Ўзбекистоннинг Владивосток шаҳридаги Бош консулхонасида айни пайтга қадар 1375 нафар ўзбекистонлик ватанга қайтиш учун рўйхатдан ўтган. Бу ҳақда «Дунё» ахборот агентлиги хабар берди.
Бош консуллик маълумотларига кўра, «Меҳр» жамғармаси кўмаги билан пандемия даврида Россиянинг Узоқ Шарқ федерал округида бўлиб турган 15 нафар Ўзбекистон фуқаросига молиявий ёрдам кўрсатилган. Шунингдек, 50 дан ортиқ киши ишга жойлаштирилган, 9 киши эса Хабаровск ва Владивостокда бепул турар жой билан таъминланган.
Мавзуга доир: Россияда пандемия сабаб оғир аҳволда қолган ўзбекистонликлар 1,2 млн рублдан ортиқ ёрдам пули олди
Таъкидланишича, оғир молиявий аҳволда қолган ўзбекистонликларга ёрдам бериш доирасида Рамазон ойи мобайнида ҳар куни Хабаровск ўлкасидаги ватандош хусусий тадбиркорлар кўмагида хайрия акциялари ўтказилган, озиқ-овқат маҳсулотлари тарқатилган.
«Бундай тадбирлар Приморье ўлкаси, Жанубий Сахалин ва Благовешенск шаҳарларида ҳам ўтказилди», — дейилади хабарда.
Мавзуга доир: Карантин сабабли Россиядаги 1000 нафардан ортиқ ўзбекистонлик талабага ёрдам кўрсатилди
Бугунгача чет элдан олиб келинган Ўзбекистон фуқаролари сони 47 минг нафарни ташкил этмоқда. Кейинги 10 кунда эса 3,5 минг одам ҳаво йўллари, 7 мингга яқин ватандош эса чегара постлари орқали Ўзбекистонга келиши кутиляпти. Бундан ташқари, 100 мингдан ортиқ фуқаро Ўзбекистонга қайтиш истагини билдириб, навбат кутмоқда.
Дастлаб 24 майгача, сўнг 7 июнгача амалга ошириладиган чартер рейслар эълон қилинди.
Шунингдек, Россия—Қозоғистон чегарасида тўпланган 1100 нафар ватандош Президент топшириғига асосан 18—19 май кунлари автобусларда Ўзбекистонга олиб келинди. Кейинчалик худди шу чегара зонасида яна юзлаб ўзбекистонликлар тўплангани маълум бўлди. ТИВ улардан вақтинчалик яшаш жойларига қайтишни сўради.
Изоҳ (0)