Rossiyada koronavirus sababli og‘ir vaziyatga tushib qolgan o‘zbekistonliklar Moskva elchixonasi tomonidan “Mehr” loyihasi doirasida yordam pullarini olishni boshladi. Bu haqda elchixona matbuot xizmati xabar berdi.
Foto: “Daryo”
Loyiha 14-maydan boshlangan edi. Shu vaqt davomida 202 nafar o‘zbekistonlik 1 million 220 ming 960 rubl miqdorida moliyaviy yordam oldi. Mablag‘lar yordam so‘rab murojaat qilgan fuqarolarning shaxsiy bank kartalariga o‘tkazib berilgan.
Ular orasida:
- Rossiya oliy o‘quv yurtlari kunduzgi bo‘limida ta’lim olayotgan 190 ta talaba;
- COVID-19 koronavirus infeksiyasi tasdiqlangan 8 nafar o‘zbekistonlik;
- 2 ta nogiron fuqaro;
- 1 ta qaramog‘ida 2 yoshgacha farzandi bor ayol;
- 1 ta homilasi 7 oydan oshgan ayol bor.
Bu Rossiyada bo‘lib turgan hamda COVID-19 pandemiyasi sababli joriy qilingan karantin va cheklov choralari sababli og‘ir vaziyatga tushib qolgan O‘zbekiston fuqarolariga bir marta beriladigan moddiy yordam pulidir.
Moliyaviy yordamni olish uchun elchixona tomonidan maxsus ishga tushirilgan o‘zbek va rus tillaridagi “мехр.рф” portali orqali murojaat yuborish lozim.
Elchixona matbuot xizmatining qayd etishicha, ushbu portal ochilgandan so‘ng o‘tgan ikki kun ichida Rossiyaning deyarli barcha nuqtalaridagi fuqarolardan 12 mingdan ortiq murojaatlar kelib tushgan. Biroq kelib tushayotgan ba’zi murojaatlar belgilangan mezonlarga to‘g‘ri kelmasligi aniqlanmoqda. Shu sababli, elchixona tomonidan “Mehr” loyihasi mezonlariga muvofiq kelmaydigan ehtiyojmand fuqarolarga boshqa mexanizmlar orqali ko‘mak berish uchun chora-tadbirlar amalga oshirilmoqda.
Eslatib o‘tamiz, Rossiyadagi o‘zbekistonliklarni vatanga qaytarish uchun 11—24-may kunlari Moskva, Qozon, Sankt-Peterburg, Rostov-Don va Novosibirsk shaharlaridan Toshkentga charter reyslar amalga oshiriladi. Charter reyslarda eng avval bemorlar, homilador ayollar, keksalar va yosh bolalilar olib kelinadi. Mazkur reyslarga chiqish uchun ro‘yxatdan o‘tish kerak.
