Тошкентда 24 май куни республика «Ипотека банк» бош бошқармаси ходимида коронавирус инфекцияси аниқлангани ҳақида хабар берилган эди. Коронавирусга қарши кураш штаби аъзоси Севара Убайдуллаева 27 май куни ўтказилган онлайн брифингда мазкур банк ходимининг эпидемиологик маршрутига оид маълумотларни эълон қилди.
Маълум қилинишича, айни пайтда коронавирус юқтирган «Ипотека банк» ходимининг вирусни қаердан юқтиргани, кимлар билан мулоқотда бўлганини аниқлаш учун суриштирувлар ўтказилмоқда.
Аниқланишича, мазкур бемор Буюк ипак йўли кўчасидаги «Салом» чойхонаси тўғрисида жойлашган «Корзинка» супермаркетида ва Ecobozor’да кунора бозорлик қилган.
Брифингда бозорларга фақат эҳтиёж бўлганда эҳтиёт чораларини кўрган ҳолда бориш мақсадга мувофиқлиги қайд этиб ўтилди.
Эслатиб ўтамиз, касалликка чалинган мазкур фуқаронинг ўзи ва оила аъзолари яқин 20 кун ичида меҳмонга бормагани, қўни-қўшниларникига ҳам чиқмагани маълум қилинганди. Унинг яшаш манзили бўйича мулоқотда бўлган барча оила аъзолари белгиланган тартибда карантинга олинган. Бемор билан мулоқотда бўлган ҳамкасблари ҳам белгиланган тартибда 14 кунлик карантин назоратига олинган. Қолган ходимлар эса яшаш манзиллари бўйича тиббий назоратга олинган. Барча мулоқотда бўлганлардан лаборатор таҳлил учун намуналар олинган.
Маълумот учун, сўнгги кунларда ўзбекистонлик икки нафар божхоначида, Давлат солиқ қўмитаси ҳузуридаги Малака ошириш маркази ходимида, «Ўрикзор» бозоридаги сотувчида коронавирус аниқланган. Шунингдек, аҳоли орасида коронавирус инфекциясини юқтириб олиш билан боғлиқ ўнлаб ҳолатлар қайд этилган.
Ўзбекистонда коронавирусга чалинганларнинг эпидемиологик маршрути билан «coronavirus.uz» сайтидаги махсус харита орқали танишиш мумкин.
Изоҳ (0)